ChatGPT kundalik vazifalarni hal qilishda ajralmas yordamchi bo‘lishi mumkin. Maishiy hayotni yengillashtirish va moliyaviy maqsadlarga bir maromda erishish uchun neyron tarmog‘idan qanday foydalanish haqida so‘zlab beramiz.
Sun’iy intellektning jadal rivojlanishiga qaramay, neyron tarmoqlar “tanlanganlar” foydalanadigan yuqori texnologiyali vosita sifatida qabul qilinishda davom etmoqda. Shu bilan birga, sun’iy intellekt do‘konga borish uchun mahsulotlar ro‘yxatini tuzish yoki retseptlarni topish kabi maishiy masalalarni hal qilishda ham qo‘llanilishi mumkin.
ChatGPT’dan qanday foydalanish mumkin: neyron tarmoq uchun tezkor g‘oyalar
- Filmlarni tavsiya qilish
Ishdan keyin dam olib, qiziqarli film ko‘rishga qaror qildingizmi? Neyrotarmoq sizning so‘rovingizga ko‘ra kinofilmlar ro‘yxatini tuzadi. Buning uchun siz so‘rovda janr, mavzu, syujet, musiqiy bezak va boshqalarni belgilishingiz kerak. Sun’iy intellekt seriallar, treklar, kitoblar, teatr spektakllarini tanlashda a’lo darajada ishlaydi.
- Mashg‘ulotlar rejasini ishlab chiqish
Individual dastur bo‘yicha murabbiy bilan fitnes klubda shug‘ullanish vaqt, kuch va xarajat talab qiladi. Uyda mashq qilish arzonroq tushadi, lekin reja kerak. Sun’iy intellekt bu yerda ham yordamga kelib, mashq variantlarini taklif qiladi.
Quyidagi namuna bo‘yicha neyron tarmoq uchun so‘rov tuzish mumkin: “O‘z vazningizdan foydalangan holda 2 oylik mashg‘ulot dasturini yarating. Razminka, “nagruzka” progressiyasini hisobga oling. Kunlar bo‘yicha takrorlashlar, setlar sonini ko‘rsating. Bajarish texnikasi bo‘yicha tavsiyalar kiriting”.
- Do‘konga borish uchun mahsulotlar ro‘yxatini tuzish
Xarid paytida ko‘pincha muhim narsalarni sotib olishni unutib qo‘yasiz. Sun’iy intellekt bir necha soniyada oziq-ovqat ro‘yxatini tuzishga yordam beradi: shunchaki o‘zingizning ovqatlanish odatlaringiz haqida ma’lumotni promptga kiritishning o‘zi yetarli.
Masalan: “4 kishilik oila uchun (ikki katta yoshli va 4 hamda 7 yoshli ikki bola) bir haftalik oziq-ovqat ro‘yxatini tuzing. Byudjet - 300 ming so‘m. Uch mahal ovqatlanishni hisobga oling. Ovqatlar tarkibida go‘sht va baliq mahsulotlari, sabzavotlar, don mahsulotlari, mevalar, sut mahsulotlari, bolalar uchun shirinliklar bo‘lishi kerak. Yarim tayyor mahsulotlar qo‘shilmasin. Ro‘yxatni toifalar bo‘yicha tuzing: go‘sht, baliq, sut mahsulotlari va hokazo. Har bir mahsulotning taxminiy miqdorini ham ko‘rsating”.
- Bolalar bayramini tayyorlash
Bolalar bayramini uyda ham o‘tkazish mumkin. Lekin buning uchun aniq dastur va xilma-xil faoliyat bo‘lishi kerak. Sun’iy intellekt tanlovlarni tanlash, menyu tuzish, kerakli jihozlarni belgilash va hatto kichkintoylarning e’tiborini qanday ushlab turish bo‘yicha maslahatlar berishga yordam beradi. Promtga byudjet, umumiy vaqt, bolalarning yoshi, tadbir mavzusi, shaxsiy afzalliklarni yozing. Neyrotarmoq vazifani bir necha soniyada bajaradi.
- Moliyaviy rejalashtirish
Jamg‘arma rejasini ishlab chiqish yoki bir oylik oilaviy byudjetni rejalashtirish oson ish emas, ammo sun’iy intellekt bunga qodir. Daromadlar miqdori, joriy xarajatlar, kapital yaratish vositalari, istaklarni ko‘rsating. Neyron tarmoqdan hisob-kitoblar bilan bosqichma-bosqich ko‘rsatma berishini so‘rang.
- Yo‘l ko‘rsatkich
Sayohatga chiqayotganda, siz har qanday turoperatorga qaraganda yaxshiroq o‘z yo‘nalishingizni tuzishingiz mumkin. Sayohat byudjeti, davomiyligi va ishtirokchilar soni, taxminiy yashash manzili va bormoqchi bo‘lgan joylaringiz, hordiq variantlarini kiriting. Neyrotarmoq sizga individual sayohat rejasini taqdim etadi.
- Retseptlarni izlash
Shunday vaziyatlar bo‘ladiki, muzlatgichda ba’zi mahsulotlar qolib ketadi, lekin ulardan nima tayyorlashni bilmaysiz. Sun’iy intellektdan ingrediyentlar va istaklaringizni ko‘rsatgan holda mos retseptni topishni so‘rang.
- Ovqatlanish rejasini tuzish
Oqilona ovqatlanish salomatlik garovidir. Ammo organizm ehtiyojlarini hisobga olgan holda taomnomani tanlash oson emas, diyetologga murojaat qilish esa qimmatga tushadi. Sun’iy intellekt siz uchun eng maqbul rejani topadi — siz shunchaki o‘z yoshingizni, mahsulot tarkibi va tayyorlash usuli, kaloriyasi, maqsadi (vazn to‘plash, ozish va hokazo) bo‘yicha afzalliklaringizni, kaloriya va maqsadingizni yozib qo‘yishingiz kerak.
- Tomorqadagi ish rejasi
Hamma narsani o‘z muddatida dala hovliga ekishga ulgurish uchun neyrotarmoqdan siz uchun bog‘dorchilik ishlarining batafsil jadvalini tuzishini so‘rang. Promptda iqlim va tuproq xususiyatlari, nimani yetishtirmoqchi ekanligingiz, vaqt oralig‘i, o‘g‘itlar va ko‘chatlar uchun byudjetni ko‘rsating. Ma’lumotni qanday formatda olishni xohlayotganingizni aniqlashtiring (jadval, nazorat ro‘yxati).
Izoh (0)