ChatGPT bugungi kunda deyarli turli sohalarda, jumladan, matn yozish, rejalar tuzish, ma’lumot qidirish va hatto moliyaviy muammolarni hal qilishda ham foydali vosita bo‘lib qolmoqda. AQSHning Delaver shtatida yashovchi ayol Open AI chat boti yordamida katta qarzdorlikni yopdi. Bu haqda Gulf News xabar berdi.
35 yoshli rieltor va kontent yaratuvchisi Jennifer Allan kredit kartasi bo‘yicha 23 000 AQSH dollari miqdorida katta qarzga botgan edi. U Newsweek nashriga bergan intervyusida barqaror daromadga ega bo‘lishiga qaramay, yetarlicha moliyaviy savodxonligi yo‘qligi sababli pullarni to‘g‘ri boshqara olmagani haqida so‘zlab berdi:
“Menga hech qachon pul bilan muomala qilishni o‘rgatishmagan. Aslida ortiqcha narsalarga pul sarflamayman, faqat kerakli ehtiyojlarimga ishlataman. Shunga qaramay, baribir qarz olishga majbur bo‘ldim”, dedi u.
Jenniferning moliyaviy ahvoli farzandi tug‘ilgach og‘irlashdi. U kutilmagan tibbiy xarajatlar va bola parvarishi bilan bog‘liq qo‘shimcha sarflar sababli yanada chuqurroq qarzga botdi. Vaqt o‘tishi bilan bu muammolardan charchagan Allan noodatiy yechim topdi: u 30 kun davomida ChatGPT’ni shaxsiy moliyaviy maslahatchi sifatida sinab ko‘rishga qaror qildi.
Ayol har kuni sun’iy intellektdan moliya, pulni boshqarish va tezroq daromad olish bo‘yicha maslahatlar so‘radi. ChatGPT unga ishlatilmayotgan obunalarni bekor qilish, arzon va oqilona ovqatlanish rejasi tuzish, byudjet nazoratini yo‘lga qo‘yish kabi oddiy, ammo samarali usullarni taklif qildi. Chat bot unga barcha bank va moliyaviy hisoblarni sinchiklab tekshirishni maslahat berdi. Bu tavsiya kutilmagan natija berdi — Jennifer brokerlik hisobida 10 000 dollar miqdorida ilgari e’tibor bermagan mablag‘ini topdi.
Bundan tashqari, u oziq-ovqat xarajatlarini kamaytirish maqsadida bir oy davomida faqat uyda bor mahsulotlar bilan ovqat tayyorlashga qaror qildi. Bu ham xarajatlarni keskin qisqartirishga yordam berdi.
Natijada Jennifer bir oy ichida 12 078 dollar miqdoridagi kreditni to‘lashga erishdi — bu jami qarzining deyarli yarmi demakdir.
“Bu qandaydir mo‘jiza yoki moliyaviy hiyla emasdi. Asosiysi, men muammoga tik boqishni, har kuni raqamlar bilan ishlashni, pul masalasida intizomli bo‘lish va muntazam harakat qilishni o‘rgandim va barchasini ijtimoiy tarmoqda bo‘lishib keldim”, dedi u.
Nyu Yorkdagi Federal zaxira banki ma’lumotiga ko‘ra, Allanning holati boshqalarnikidan farq qiladi, chunki 2025-yilning boshida AQSHdagi uy xo‘jaliklari umumiy qarzi 18,2 trillion dollarga yetgan.
Izoh (0)