Xitoyning Xebey viloyatida yashovchi Chjan Guosin va Hay Chao ismli egizak opa-singillar tug‘ilganlaridan atigi 10 kun o‘tib turli oilalar tomonidan asrab olingan. Qizig‘i shundaki, oradan 17 yil o‘tib, ular taqdir taqozosi bilan uchrashib qolgan va bir-biriga juda o‘xshashliklarini sezgan. Ular avvaliga yaqin dugonaga aylangan, keyinchalik esa aslida egizak opa-singil ekani ayon bo‘lgan.
Biologik ota-onalari moddiy imkoniyat yo‘qligi sababli ularni boqolmasliklarini aytib, farzandlarini asrab olishga bergan. Asrab olish shartlaridan biri: ikkala oila ham Xitoyning shimolidagi Xebey provinsiyasida bo‘lishi kerak edi. Shu tariqa, opa-singillar bir-birining borligidan bexabar holda alohida voyaga yetdi. Faqat 17 yoshga to‘lganlarida ular o‘zaro tanishdi.
Hay maktabda o‘qiyotgan vaqtida sinfdoshidan yaqin atrofdagi kiyim do‘konida o‘ziga juda o‘xshash qiz ishlashi haqida eshitadi va ko‘rishga qaror qiladi. Hay do‘konga borib, Chjanni ilk bor ko‘rganida darhol ichki bir yaqinlik his qiladi.
Tez orada ular tug‘ilgan kunlari aynan bir xil ekanini, 100 kunlik chog‘larida ikkalasi ham og‘ir kasallikka chalinganini, ovozlari, soch turmaklari va hatto ta’bi ham bir xil ekanini bilib olishadi.
Ular 14 oy davomida faqat dugona bo‘lishgan. Bu vaqt davomida ikkala qizni asrab olgan oilalar ularning egizak ekani haqida haqiqatni yashirib kelgan, chunki bu sir ochilsa, o‘gay ota-onalar qizlarning biologik ota-onasini izlab ketishidan qo‘rqqan.
Nihoyat, 14 oydan so‘ng haqiqat ochiladi — Chjan va Hay egizaklar ekani tan olinadi. Qaysi biri katta ekanini aniqlash uchun ular “qog‘oz-qaychi-tosh” o‘yinini o‘ynaydi va Chjan yutib chiqadi. Keyinroq ota-onalari aslida u haqiqatan ham kattasi ekanini tasdiqlaydi.
Tasodiflar shu bilan tugamagan. Opa-singillar hech qanday kelishuvsiz bir-biriga yaqin joylardagi uylarni sotib olishgan. Ikkovining ham farzandlari hozir 13 yoshda va hattoki bir sinfda o‘qiydi. Hayning aytishicha, bolalari ham bir-biriga juda o‘xshaydi. Ba’zida ota-onalar yig‘ilishiga faqat bittasi boradi, o‘qituvchilar esa kim kimligini ajrata olmaydi.
Bugungi kunda opa-singillar 37 yoshda. Ular birgalikda yuritayotgan ijtimoiy tarmoq sahifasining 62 mingdan ortiq obunachisi bor. Ular yaqinda uchrashuvlarining 20 yilligini nishonladi. Hozirga qadar ular biologik ota-onalarini izlamagan.
“Oxirgi 20 yilning har bir kuni baxtli o‘tdi. Seni uchratganimdan juda minnatdorman. Keyingi 20 yilga umid bilan qaraylik”, deb yozadi ular sahifasida.
Izoh (0)