Xitoyning Sichuan provinsiyasida yashovchi 35 yoshli Min Xentsay ish va nikohdan hafsalasi pir bo‘lgach, g‘orda yashay boshladi. Bu haqda South China Morning Post yozmoqda.
Ilgari Xentsay shaharda kuniga 10 soatdan taksi haydovchisi bo‘lib ishlagan va bu faoliyat unga oyiga taxminan 1400 dollar daromad keltirgan. Qarindoshlar oldidagi qarzdorlik tufayli u ko‘p ishlashi kerak edi.
Uning so‘zlariga ko‘ra, u kredit tashkilotlariga ham 42 ming dollar qarzdorligi bo‘lgan. Oxir-oqibat qarindoshlari uning mol-mulkini sotib yuborganini bilgach, qarzlarini to‘lay olmasligini tushunib yetdi. Shunday qilib, 2021-yilda Min o‘z vataniga qaytib, yolg‘iz hayot tarzini boshlashga qaror qildi.
Erkak o‘zining yer uchastkasini qishloqdoshining kichikroq uchastkasiga almashtirdi va yonidagi g‘ordan foydalanish imkoniyatiga ega bo‘ldi. 50 kvadrat metrlik g‘ordagi uyini jihozlash uchun u 6000 dollar sarflagan.
Har kuni Xentsay ertalab soat 8 da uyg‘onadi va butun kunni kitob o‘qish, sayr qilish hamda polizda ishlash bilan o‘tkazadi, shuningdek, 40 ming obunachiga ega bo‘lgan blog yuritadi. Soat o‘n ikkilarda uxlashga yotadi. Uning ovqatlanish ratsioniga asosan o‘zi yetishtirgan sabzavotlar kiradi.
Erkak o‘z uyini hazil tariqasida “qora tuynuk” deb ataydi va shaharda yashab, ishlaganida aynan shunday hayot tarzini orzu qilganini tan oladi.
Xentsay ishni bemaʼni mashg‘ulot deb hisoblaydi. Shuningdek, u uylanishni istamaydi, chunki u nikohni “vaqt va pulni behuda sarflash” deb o‘ylaydi. “Haqiqiy muhabbatga duch kelish ehtimoli juda kam. Nega men shunday noyob narsa uchun astoydil mehnat qilishim kerak”, dedi u.
Izoh (0)