Rossiyaning Krasnodar o‘lkasida yashovchi ayol 485 grammli g‘ayrioddiy o‘lchamga ega sarimsoq yetishtirdi. Bu haqda RBK xabar berdi. Ayol mahsulotni o‘zi yetishtirganini aytgan, biroq bu natijaga erishish uchun qancha vaqt ketgani va sarimsoqning qanday navga mansub ekanini ochiqlamagan.
Ijtimoiy tarmoq foydalanuvchilari bu “filsimon sarimsoq” nomi bilan tanilgan rokambol (piyoz va sarimsoqning ulkan gibridi) navi bo‘lishi mumkinligini taxmin qilmoqda. Odatda bu navdagi sabzavot vazni 200–300 gramm bo‘ladi. Taqqoslash uchun: oddiy sarimsoq boshining og‘irligi 30–50 grammni tashkil etadi.
Rekord sifatida qayd etilgan dunyodagi eng og‘ir sarimsoq 1,19 kilogramm bo‘lgan. Uni 1985-yilda AQSHning Kaliforniya shtatida yashovchi Robert Kirkpatrik yetishtirgan. Bu natija Ginnes rekordlar kitobiga kiritilgan.
2024-yil kuzda sankt peterburglik Yuliya Bogdanova ham gigant sabzavot — 226 kilogrammli qovoq yetishtirgan. So‘ng undan qayiq yasab, Strechino ko‘lida suzgan. Keyin qovoq bo‘laklarga bo‘linib, hayvonlar va qushlar uchun ozuqa sifatida ishlatilgan.
Izoh (0)