Lego va Nike kompaniyalari 2025-yil yozida boshlanadigan hamkorlik loyihasini e’lon qildi. Nike x Lego Collection deb nomlangan loyiha doirasida o‘smirlar uchun kiyim-kechak, poyabzal, aksessuarlar va maxsus Lego to‘plamlari ishlab chiqariladi. Dizaynni yaratish jarayonida bolalar va o‘smirlar ham ishtirok etadi.
1-iyuldan Lego Nike Dunk x Lego Set nomli konstruktor to‘plami sotuvga chiqariladi. Narxi 99,99 yevro bo‘lgan ushbu to‘plam 1180 ta detalni o‘z ichiga oladi va Nike Dunk krossovkasini Lego ko‘rinishida aks ettiradi.
To‘plamda maxfiy bo‘linmalar, almashtiriladigan bog‘ichlar, aylanuvchi basketbol to‘pi, “DUNK” yozuvi, ikkita mayda figurka va mini krossovkalar mavjud. Model o‘lchami 25 x 38 x 13 santimetrni tashkil qiladi.
1-avgustdan Lego uslubidagi Nike Air Max Dn krossovkasi ham sotuvga chiqariladi. U sariq rangda bo‘lib, sirti Lego g‘ishtlariga o‘xshash uslubda ishlanadi va maxsus logotipga ega boladi. 1-sentyabrdan esa oq rangdagi Lego x Nike Dunk Low modelining taqdimoti bo‘lib o‘tadi.
Yangi kolleksiya Lego va Nike rasmiy do‘konlarida hamda ularning onlayn platformalarida sotuvga chiqariladi.
Izoh (0)