Tayvandagi MSI (Micro-Star International) nomli kompyuter texnologiyalari ishlab chiqaruvchi kompaniya “O‘yinchoqlar tarixi” animatsion filmining 30 yilligi munosabati bilan cheklangan miqdordagi MAG PANO Toy Story Edition shaxsiy kompyuterlarini taqdim etdi. Ushbu seriya Pixar multfilmining asosiy qahramonlari — Bazz Layter va Vudiga bag‘ishlangan dizayni bilan ajralib turadi.
Kompyuterning yubiley versiyasi multfilm qahramonlari uslubida bezatilgan bir nechta qismlarni o‘z ichiga oladi. Masalan, RTX 5070 Gaming Trio videokartasi Bazz Layter uslubida ishlangan, Z890 Gaming Plus ona plata esa sherif Vudi uslubiga xos ranglarda taqdim etilgan.
Suyuq sovitish tizimi o‘zga sayyoraliklar rasmi bilan bezatilgan, MAG PANO 110R korpusi esa multfilm birinchi qismidagi mashhur yashil maxluqchalarni eslatadi.
Bundan tashqari, A850GL quvvat bloki va multfilm qahramonlari o‘yinchoqlari ham komplektatsiyaga kiradi. Kompyuter to‘liq komplekt holatida sotiladi: u Intel Core Ultra 5 245K protsessori, 32 GB tezkor xotira va 1 TB SSD bilan jihozlangan.
Kompyuter narxi 80 900 Tayvan dollari (taxminan 2733 AQSH dollari)ni tashkil qiladi. MSI jami 500 dona shunday kompyuter ishlab chiqargan. Ayni paytda ularni faqat Tayvan bozorlarida xarid qilish mumkin. Kompaniya vakillarining aytishicha, muxlislar tomonidan katta qiziqish bildirilsa, tematik kompyuterlar xalqaro bozorda ham sotuvga chiqarilishi mumkin.
Ma’lumot uchun, “O‘yinchoqlar tarixi” multfilmi ilk bor 1995-yil 22-noyabrda ekranlarga chiqqan va u to‘liq 3D formatda yaratilgan dunyodagi birinchi to‘liq metrajli animatsion film hisoblanadi. Film Pixar uchun katta muvaffaqiyat olib kelgan va butun dunyo bo‘ylab 373 million dollar daromad keltirgan. Bugungi kunga qadar uning to‘rtta asosiy qismi, bir nechta qisqa metrajli animatsiyalari va spin-off’lari ishlab chiqilgan.
Izoh (0)