Germaniya sharqidagi Ayzenxyuttenshtadt shahri maʼmuriyati barcha xohlovchilarga ikki haftalik bepul turar joy taklif qildi. Bunday chora aholi sonining o‘sishiga yordam berishi kutilmoqda. Bu haqda AQSHning CNN telekanali xabar berdi.
Mahalliy kengash bayonotiga ko‘ra, Berlindan taxminan 96 km uzoqlikda, Polsha bilan chegarada joylashgan Ayzenxyuttenshtadt shahri ma’muriyati ehtimoliy yangi rezidentlarga 14 kunlik “sinov turar joyi”ni taklif qiladi. Xabarlarga ko‘ra, taklif bu yerga doimiy yashash uchun ko‘chib kelishni rejalashtirayotganlarga qaratilgan. Xususan, gap “vaziyatni o‘zgartirishni xohlaydigan” malakali ishchilar va o‘zini o‘zi band qilganlar haqida ketmoqda.
Tanlab olingan ishtirokchilar 6—20-sentyabr kunlari “Rejalarni hozirdan tuzing” nomli innovatsion immigratsiya loyihasi doirasida jihozlangan kvartirada bepul yashaydi”, dedi mahalliy hokimiyat vakillari. Ikki hafta davomida odamlar shahar hayoti bilan tanishib, infratuzilmasini o‘rganishi rejalashtirilgan.
Qanday shahar?
Ayzenxyuttenshtadt (nomi “po‘lat quyuvchilar shahri” deb tarjima qilingan) 1950-yilda sobiq Sharqiy Germaniya sotsialistik hukumati davrida tashkil etilgan. Ilgari sobiq Sovet rahbari Iosif Stalin sharafiga Stalinshtadt yoki Stalingrad nomi bilan tanilgan, 1989-yilda Berlin devori qulaganidan keyin Sharqiy va G‘arbiy Germaniya birlashgandan so‘ng qayta nomlangan.
Sobiq Sharqiy Germaniyaning ko‘plab shaharlarida bo‘lgani kabi, mamlakat qayta birlashganidan keyin bu yerda aholi soni 50 mingdan ortiq kishidan hozirgi 24 mingga yaqin kishiga kamaydi.
Bugungi kunda Ayzenxyuttenshtadtda 2500 kishi ishlaydigan Sharqiy Germaniyadagi eng yirik integratsiyalashgan po‘lat zavodi, shuningdek, metallni qayta ishlash markazi joylashgan. Sotsialistik davrdagi ko‘plab binolar tarixiy yodgorliklar ro‘yxatiga kiritilgan.
Izoh (0)