Shvetsiyada uch farzandining og‘iz bo‘shlig‘i salomatligiga befarq bo‘lgan ota-onalar qamoq jazosiga tortildi. Bu haqda Aftonbladet nashri xabar berdi.
Nashr ma’lumotiga ko‘ra, voqea bolalar stomatologga murojaat qilganidan so‘ng fosh bo‘lgan. Buros shahridagi stomatologlar bolalar tishlari holatidan xavotir bildirib, bu haqda tegishli idoralarga xabar bergan. Shifokor uch nafar bolada jiddiy kariyes borligini aniqlagan va yallig‘langan tishlarni olib tashlashga majbur bo‘lgan.
Bolalardan biri uchun holat shu qadar og‘ir bo‘lganki, uning sakkizta tishi narkoz ostida sug‘urib tashlangan. Qolgan aka-ukaning ham kelajakda sog‘liq bilan bog‘liq muammolarga duch kelish xavfi mavjud.
Operatsiyadan so‘ng stomatologlardan biri bolalardan birining og‘ziga qarab yuragi bezovta bo‘lganini guvohlik sifatida bayon qilgan. Tergov davomida ota-onalar aybni tan olmadi va farzandlariga imkon qadar yaxshi qaraganliklarini ta’kidladi. Biroq sud ularning bu da’volarini rad etdi.
Sud tibbiy hujjatlar va dalillar asosida ota-onalarni voyaga yetmaganlarga nisbatan jinoiy loqaydlikda aybdor deb topdi. Ular 8 oy muddatga ozodlikdan mahrum etildi.
Shvetsiya qonunchiligiga ko‘ra, ota-onalar farzandlarining nafaqat ta’limi va farovonligi, balki sog‘ligi, jumladan tish parvarishini ham ta’minlashga majburdir. Bu majburiyatni bajarmaslik bolalarga yetkazilgan jiddiy zarar sifatida baholanadi va jismoniy yoki psixologik zo‘ravonlik bilan teng darajada ko‘riladi.
Izoh (0)