Angliyaning Glostershir grafligida bir yil avval yo‘qolgan Jinjer laqabli toshbaqa egasining uyidan bir mil (taxminan 1,5 km) naridagi pab ortidan topildi, deb yozadi Daily Mail nashri.
Jinjer 10 yil davomida Sara-Jeyn Muri ismli ayolning uy hayvoni bo‘lib yashagan. 2024-yil iyun oyida u qishloqdagi panjara ostidagi yerni kovlab chiqib, dalaga qarab yo‘l olgan. Ayolning veterinar do‘sti so‘zlariga ko‘ra, Jinjer bir necha yil avval jon bergan yana bir uy toshbaqasi — Fredni izlab ketgan bo‘lishi mumkin.
Murining so‘zlariga ko‘ra, ular toshbaqani uzoq vaqt qidirgan:
“U berkinishga usta jonivor, shuning uchun mitti do‘stimizni izlab topishning imkoni yo‘q deb o‘yladik. Shunga qaramay, uyimiz atrofiga e’lonlar ilib chiqdik”, deydi Muri.
Oradan bir yil o‘tib ham toshbaqa topilmagach, ayol undan umidini uzgan edi. Ammo kutilmaganda unga qo‘ng‘iroq qilib, Jinjer pab yonidan topilganini aytishgan:
“Uni qaytarib olganimiz biz uchun mo‘jizaviy voqea bo‘ldi. Chunki toshbaqalar yolg‘iz holda qishdan omon chiqishi juda qiyin”, deydi toshbaqa egasi.
Hozirda Jinjer avvalgidek Muri xonadonining orqa hovlisida yashab kelmoqda.
Izoh (0)