Xitoydagi Man Wah Holdings nomli yirik mebel kompaniyasi o‘z ishchilariga nisbatan qo‘llayotgan qat’iy va noodatiy talablari bilan internetda keng muhokamaga sabab bo‘ldi. Kompaniya rahbariyati xodimlarga ish vaqtida oynaga qarash va ish stolida ovqatlanishni taqiqlagan. Bu qoidani buzganlarga esa 280 dollargacha jarima solinishi mumkin.
Bunday talablar yoritilgan post savdo bo‘limining yuqori lavozimli vakili Lyu tomonidan may oyida e’lon qilingan, biroq foydalanuvchilar unga yaqinda e’tibor bera boshlashgan.
Postda yozilishicha, kompaniya ishchilari faqat o‘z ish stolida bo‘lishi, rahbariyat topshiriqlarini so‘zsiz bajarishi va kerak bo‘lsa, qo‘shimcha soatlar ham ishlab berishi shart. Kim bu qoidalarga bo‘ysunishni istamasa, kompaniya u bilan mehnat shartnomasini bekor qiladi.
Bundan tashqari, sababsiz holda 10 daqiqadan ortiq ish joyini tark etish, kompyuterni o‘chirmay ketmaslik, stulni belgilangan tartibda qo‘ymaslik uchun ham jazo beriladi. Har bir ishchi kun davomida olti marotaba maxsus varaqani to‘ldirib, ishda ekanligini isbotlab turishi lozim.
“Agar xodimlardan biri ish stolida ovqatlanayotganda ushlansa, bosh menejer 2000 yuan (280 dollar), bo‘lim rahbari 1000 yuan (140 dollar), menejer yordamchisi esa 500 yuan (70 dollar) jarima to‘laydi”, deb yozgan Lyu.
Shu bilan birga, u mana shunday tartibga doim amal qilgan, topshiriqlarni vijdonan bajarayotgan xodimlar rag‘batlantirilishini ham bildirgan. Uning so‘zlariga ko‘ra, jiddiy ishlamayotganlardan yig‘ilgan jarima pullari aynan intizomli xodimlarga mukofot sifatida beriladi:
“Men ularning jarimasidan haqiqiy mehnatkashlarga bonus to‘layman”, degan Lyu.
1992-yilda tashkil etilgan Man Wah Holdings kompaniyasida hozirda 27 ming nafarga yaqin kishi mehnat qilmoqda. Biroq bu talablar barcha bo‘limlarga taalluqlimi yoki faqat ayrimlariga, hozircha aniq emas. Ayni paytda holat yuzasidan ichki tekshiruvlar boshlangan.
Xitoydagi “Kangda” yuridik firmasi yuristi Yao Kun tushuntiradi: mamlakat mehnat qonunchiligida bunday keskin choralar nazarda tutilmagan. Ayniqsa, ish beruvchi xodimning shaxsiy hududi va huquqini buzishga yo‘l qo‘yilmaydi.
Izoh (0)