ChatGPT бугунги кунда деярли турли соҳаларда, жумладан, матн ёзиш, режалар тузиш, маълумот қидириш ва ҳатто молиявий муаммоларни ҳал қилишда ҳам фойдали восита бўлиб қолмоқда. АҚШнинг Делавер штатида яшовчи аёл Open AI чат боти ёрдамида катта қарздорликни ёпди. Бу ҳақда Gulf News хабар берди.
35 ёшли риэлтор ва контент яратувчиси Женнифер Аллан кредит картаси бўйича 23 000 АҚШ доллари миқдорида катта қарзга ботган эди. У Newsweek нашрига берган интервьюсида барқарор даромадга эга бўлишига қарамай, етарлича молиявий саводхонлиги йўқлиги сабабли пулларни тўғри бошқара олмагани ҳақида сўзлаб берди:
“Менга ҳеч қачон пул билан муомала қилишни ўргатишмаган. Аслида ортиқча нарсаларга пул сарфламайман, фақат керакли эҳтиёжларимга ишлатаман. Шунга қарамай, барибир қарз олишга мажбур бўлдим”, деди у.
Женнифернинг молиявий аҳволи фарзанди туғилгач оғирлашди. У кутилмаган тиббий харажатлар ва бола парвариши билан боғлиқ қўшимча сарфлар сабабли янада чуқурроқ қарзга ботди. Вақт ўтиши билан бу муаммолардан чарчаган Аллан ноодатий ечим топди: у 30 кун давомида ChatGPT’ни шахсий молиявий маслаҳатчи сифатида синаб кўришга қарор қилди.
Аёл ҳар куни сунъий интеллектдан молия, пулни бошқариш ва тезроқ даромад олиш бўйича маслаҳатлар сўради. ChatGPT унга ишлатилмаётган обуналарни бекор қилиш, арзон ва оқилона овқатланиш режаси тузиш, бюджет назоратини йўлга қўйиш каби оддий, аммо самарали усулларни таклиф қилди. Чат бот унга барча банк ва молиявий ҳисобларни синчиклаб текширишни маслаҳат берди. Бу тавсия кутилмаган натижа берди — Женнифер брокерлик ҳисобида 10 000 доллар миқдорида илгари эътибор бермаган маблағини топди.
Бундан ташқари, у озиқ-овқат харажатларини камайтириш мақсадида бир ой давомида фақат уйда бор маҳсулотлар билан овқат тайёрлашга қарор қилди. Бу ҳам харажатларни кескин қисқартиришга ёрдам берди.
Натижада Женнифер бир ой ичида 12 078 доллар миқдоридаги кредитни тўлашга эришди — бу жами қарзининг деярли ярми демакдир.
“Бу қандайдир мўжиза ёки молиявий ҳийла эмасди. Асосийси, мен муаммога тик боқишни, ҳар куни рақамлар билан ишлашни, пул масаласида интизомли бўлиш ва мунтазам ҳаракат қилишни ўргандим ва барчасини ижтимоий тармоқда бўлишиб келдим”, деди у.
Нью Йоркдаги Федерал захира банки маълумотига кўра, Алланнинг ҳолати бошқаларникидан фарқ қилади, чунки 2025 йилнинг бошида АҚШдаги уй хўжаликлари умумий қарзи 18,2 триллион долларга етган.
Изоҳ (0)