Hindistonda firibgar ayol uch yil ichida 15 marta turmushga chiqdi. U erkaklarni aldab, ularning pul va taqinchoqlarini o‘g‘irlagan

Har safar “to‘y”da soxta ruhoniylar va kelinning qalbaki ota-onasi ishtirok etdi. Hindistonning Prayagraj shahrida politsiya yolg‘iz erkaklarni aldab, ularning jamg‘armalarini o‘g‘irlagan jinoiy guruhni qo‘lga oldi. Bu haqda Live9News xabar bermoqda.

Jinoyatchilar puxta ishlab chiqilgan rejaga ko‘ra harakat qilishdi: soxta “kelin” bo‘ydoq erkaklar bilan tanishib, ularni turli yo‘llar bilan nikohga ko‘ndirardi. Ish marosimga yetganda, jinoyatchilar soxta ruhoniylar va kelinning qalbaki ota-onasini taklif qilishardi.

Tantanali marosimdan so‘ng tez orada, “kelin” taqinchoqlarni olib qochib ketagan. Ba’zan jinoyatchi ayol qaynona-qaynotasining uyida ikki-uch kungacha qolishiga to‘g‘ri kelardi. Agar uydan chiqish qiyin bo‘lsa, soxta ota-onalar kelib, yana bir marosim o‘tkazish bahonasida kelinni olib ketishardi. Ushbu usul bilan to‘da uch yil davomida ishladi va shu vaqt ichida 20 ta soxta to‘y uyushtirdi.

Bundan oldin, Xitoylik firibgar ayol 36 nafar erkakni uy sotib olishga ko‘ndirgani ma’lum bo‘lgan edi. Erkaklarning barchasi o‘zlarini qiz bilan romantik munosabatda ekanliklarini o‘ylashardi. Biroq bitimlar rasmiylashtirilgandan so‘ng, firibgar ayol izsiz g‘oyib bo‘lgan edi.