Lego kompaniyasi “To‘qsoninchi yillarga qaytish” nomli tanlov natijalarini e’lon qildi. Ushbu dastur doirasida muxlislar konstruktor asosida yaratilgan eng yaxshi g‘oyalar uchun ovoz berishdi. Ishtirokchilar ikki toifada loyihalar taqdim etishgan: yirik (1 000 dan 5 000 gacha detal) va ixcham (200 dan 1 000 gacha detal).
Yirik toifadagi g‘olib — WetWired taxallusli foydalanuvchi tomonidan yaratilgan “Maxfiy hujjatlar” (“The X-Files”) seriali asosidagi konstruktorlik to‘plami bo‘ldi. Unda Skalli va Malderning ofisi, o‘rmondagi noma’lum uchuvchi obyekt sahnasi va mashhur “Men ishonishni istayman” (“I want to believe”) yozuvi tushirilgan plakat aks etgan.
Shuningdek, to‘plamda serialdagi turli detallarga ishoralar berilgan va mashhur qahramonlar — Skalli, Malder, o‘zga sayyoralik, Jersi hamda boshqa qahramonlar shakli ham taqdim etilgan.
Ixcham toifadagi lego tanlovida esa Pidelium taxallusli foydalanuvchi g‘olib bo‘ldi. U “Uolles va Gromit” animatsion filmidan olingan sahnani taqdim etdi. O‘sha kadrda bosh qahramonlar aravachali mototsiklda katta tezlikda harakatlangan edi.
Endilikda har ikkala loyiha Lego dizaynerlari tomonidan ishlab chiqish bosqichiga o‘tkaziladi. Ular konstruksiyalarni kompaniya standartlariga moslashtirib, ulgurji ishlab chiqarishga tayyorlashadi. Yangi to‘plamlar qachon savdoga qo‘yilishi hozircha noma’lum.
Izoh (0)