Yaponiyaning Yamagata aeroportida qora ayiq sababli ko‘plab reyslar bekor qilindi. Bu haqda The Guardian nashri xabar berdi.
Hodisa 26-iyun kuni ertalab sodir bo‘lgan. Bo‘yi taxminan 1,2 metr bo‘lgan ayiq o‘rmondan chiqib, aeroport hududiga kirib kelgan va uchish-qo‘nish yo‘lagiga o‘tib ketgan.
Aeroport xodimlari uni uzoq vaqt davomida quvib chiqara olmagani sababli dispetcherlar o‘nlab reyslarni bekor qilishga majbur bo‘lgan. Parvozlar ikki marta to‘xtatilgan. Avvaliga kun davomida ayiq bir muddat ko‘rinmay qolgan, biroq oradan ko‘p o‘tmay hayvon yana uchish-qo‘nish yo‘lagiga qaytgan.
Voqea videosi ijtimoiy tarmoqlarda tarqaldi. Unda ayiq avtomobildan qochayotgani aks etgan.
Aeroport vakillarining ta’kidlashicha, ular “ilojsiz ahvolda qolgan”.
Yaponiyada odamlar va ayiqlar to‘qnashuvi soni rekord darajaga yetgan: 2023-yil apreldan 2024-yil aprelgacha 219 kishiga ayiq hujum qilgan, shulardan olti nafari halok bo‘lgan.
Olimlarning aytishicha, iqlim o‘zgarishi ayiqlarning qishki uyqu davri davomiyligi va oziq-ovqat manbalariga ta’sir qilmoqda. Natijada ular aholi yashaydigan hududlarga chiqib kelmoqda.
Izoh (0)