Eron oliy rahnamosi Isroil-Eron o‘rtasida o‘t ochishni to‘xtatish bo‘yicha kelishuvga erishilganidan beri birinchi marta ommaviy chiqish qildi. Oyatulloh Ali Xomanaiy o‘z nutqida AQSH mamlakat yadroviy obyektlariga berilgan zarbalardan “hech qanday yutuqqa erishmaganini” ta’kidladi. Bu haqda BBC xabar berdi.
Oliy rahnamo yadroviy obyektlarga qilingan hujumga javoban Qatardagi Amerika aviabazasi nishonga olinganinga izoh berdi va uni “og‘ir zarba” deb atadi.
“Bu voqea kelajakda ham takrorlanishi mumkin. Agar yana biror hujum sodir bo‘lsa, dushmanlar og‘ir badal to‘laydi”, dedi u.
Isroil 13-iyun kuni Eronga urush boshlanganidan beri Xomanaiy jamoatchilik e’tiboridan chetda bo‘lib kelgandi. U bunkerda yashiringani va aloqalarni cheklagani haqida xabarlar tarqalgan. Xomanaiy 26-iyun kuni xalqqa videomurojaat bilan chiqib, “agar Eronga yana hujum uyushtirilsa, AQSHning Yaqin Sharqdagi bazalariga ko‘proq zarba berish” bilan tahdid qilgandi. Shunindek, u o‘t ochishni to‘xtatish kuchga kirgach, Isroil hamda AQSH ustidan g‘alaba qozonilganini e’lon qilgan.
AQSH mudofaa vaziri Pit Xegsetga ko‘ra, havo hujumlarida Eron “yadro dasturiga jiddiy zarar yetkazgan va uni tiklashga yillar ketadi”. AQSH prezidenti Donald Tramp ham Eronning 3 ta muhim yadroviy obyektiga berilgan zarbalar ularni “butunlay yo‘q qilganini” ta’kidlagan. Pentagonda 26-iyun kuni bo‘lib o‘tgan matbuot anjumanida Xegset Eron missiyasi “tarixiy muvaffaqiyat” bo‘lganini aytgan.
Eron Sog‘liqni saqlash vazirligi 12 kunlik urush davomida 610 kishi halok bo‘lganini, Isroil hukumati esa 28 kishi halok bo‘lganini bildirgan.
Izoh (0)