Qo‘shma Shtatlar va Xitoy o‘rtasida savdo shartnomasi imzolandi. Bu haqda Xitoy savdo vazirligi 9-10-iyun kunlari Londonda bo‘lib o‘tgan Xitoy-Amerika muzokarasi yakunlari bo‘yicha bayonotda ma’lum qildi.
Bayonotga ko‘ra, Pekin nazorat ostidagi tovarlarni eksport qilishni ma’qullaydi. Qo‘shma Shtatlar esa, o‘z navbatida, Xitoyga joriy qilingan bir qator cheklovlarni bekor qiladi. Pekin ikki davlat rahbarlari o‘rtasidagi muhim konsensus va 5-iyun kuni bo‘lib o‘tgan telefon muloqoti chog‘ida bildirilgan talablar e’tiborga olinishini kutmoqda.
Tomonlar “konsensusni mustahkamlash, tushunmovchiliklarni kamaytirish, hamkorlikni rivojlantirish va ikki mamlakat o‘rtasidagi savdo-iqtisodiy munosabatlarning sog‘lom, barqaror va izchil rivojlanishiga birgalikda harakat qilish”ga kelishib olgan.
AQSH prezidenti Donald Tramp 2-aprel kuni bir qator davlatlar, jumladan, Xitoyga savdo bojlari joriy etilishini e’lon qilgan. Bunga javoban Pekin ham tariflar joriy etgan. Oqibatda, ikki davlat o‘rtasida ziddiyat kelib chiqqan. AQSH Xitoy tovarlariga bojlarni 145 foizga, Xitoy esa Amerika tovarlariga bojlarni 125 foizga ko‘targandi.
Savdo mojarosining keskinlashuvi fonida AQSH va Xitoy rasmiylari 10-11-may kunlari Jenevada muzokaralar o‘tkazib, o‘zaro tariflarni 90 kunga vaqtincha to‘xtatishga kelishib olgan. Unga ko‘ra, 14-maydan boshlab Qo‘shma Shtatlar Xitoy tovarlariga bojlarni 145 foizdan 30 foizga, Xitoy esa 125 foizdan 10 foizga tushirgandi.
Izoh (0)