AQSH prezidenti Donald Tramp “Amerika ovozi” radiostansiyalari tarmog‘ini “to‘liq halokat” deb atadi va kongressdagi partiyadoshlarini uni butunlay yo‘q qilishga undadi. Bu haqda u o‘zining Truth Social ijtimoiy tarmog‘ida bildirdi.
“Nima uchun respublikachi demokratlarning ‘karnay’i bo‘lgan ‘Amerika ovozi’ (VOA) faoliyatini davom ettirishni istaydi? Bu butunlay to‘liq, so‘l halokat. Hech bir respublikachi uning saqlanib qolishi uchun ovoz bermasligi kerak. Uni yo‘q qiling!”, deya yozgan Tramp.
AQSH prezidenti Donald Tramp 14-mart kuni AQSH hukumatining Global ommaviy axborot vositalari agentligi (USAGM) va boshqa hukumat tuzilmalari faoliyatini sezilarli darajada qisqartirish to‘g‘risidagi farmonni imzoladi. Ular orasida “Ozod Yevropa/Ozodlik radiosi” va “Amerika ovozi”ni nazorat qiluvchi AQSH hukumatining Global media agentligi (USAGM) ham bor edi.
Trampning qaroriga ko‘ra, ba’zi davlat tashkilotlari o‘z funksiyalari va xodimlarining faoliyatini AQSH qonunchiligida ko‘zda tutilgan minimal darajagacha qisqartirishi kerak edi.
Mart oyida “Amerika ovozi” xodimlari Tramp ma’muriyatini telekanal faoliyatini noqonuniy to‘xtatishda ayblab, Nyu Yorkdagi federal sudga da’vo arizasi kiritdi. Aprel oyi oxirida AQSH federal sudyasi Roys Lambert hukumatga “Amerika ovozi” radiostansiyasini o‘z ichiga olgan AQSH Global media agentligi (USAGM) faoliyatini qayta tiklash, shuningdek, agentlikning barcha xodimlarini qayta ishga olish majburiyatini yukladi. Qaror “Amerika ovozi”ning bir qator xodimlari tomonidan USAGM’ni tarqatib yuborish to‘g‘risidagi qaror yuzasidan berilgan da’vo arizasini ko‘rib chiqish jarayonida qabul qilindi.
O‘tgan haftada “Amerika ovozi” radiostansiyasining 600 dan ortiq xodimi ishdan bo‘shatildi.
Ta’kidlanishicha, ishdan bo‘shatilgan jurnalistlarning bir qismi iyun oyi oxirigacha AQSHni tark etishi kerak, chunki ularning immigratsion maqomi yangiliklar tashkilotidagi ishi bilan bog‘liq edi.
Izoh (0)