Suriya xavfsizlik kuchlari mamlakat sobiq prezidenti Bashar Asadning amakivachchasini qo‘lga oldi. U giyohvand moddalar savdosi va boshqa huquqbuzarliklarda ayblanmoqda. Bu haqda respublika Ichki ishlar vazirligiga tayanib SANA xabar berdi.
Vasim Asad Suriya-Livan chegarasida Umumiy razvedka xizmati va Ichki ishlar vazirligi xodimlari tomonidan ushlangan. U giyohvand moddalar savdosi bilan shug‘ullangani va Bashar Asad davrida bir nechta jinoyatlarga aloqador bo‘lgani aytilmoqda.
2025-yil bahorida Yevropa Ittifoqi va Qo‘shma Shtatlar unga qarshi sanksiyalar kiritgan. U o‘shanda kaptagon va amfetamin savdosida ayblangandi. Vasim Badi al-Asad Suriya armiyasi tarkibidagi harbiylashtirilgan bo‘linmaga qo‘mondonlik qilgan.
U “rejimni qo‘llab-quvvatlash uchun sekta militsiyalarini tuzishga ommaviy chaqirgan” va “giyohvand moddalarning noqonuniy aylanishi bo‘yicha mintaqaviy tarmoqda asosiy shaxs” hisoblanadi, deya ta’kidlaydi AQSH Moliya vazirligi.
Sanksiyalar prezidentning amakivachchasi Samir Asadga ham ta’sir qilgan. AQSH va Suriya rasmiylariga ko‘ra, u O‘rta Yer dengizi sohilida joylashgan Latakiya va Kalamun shaharlari hududidagi kaptagon giyohvandlik vositasini ishlab chiqarish bo‘yicha asosiy obyektlarni nazorat qilgan.
2024-yilda Livan poytaxti Bayrut aeroportida mamlakatni soxta Suriya pasportlari bilan tark etishga uringan Suriya prezidenti qarindoshlari — amakivachchasi Dureydning rafiqasi va qizi qo‘lga olingan edi.
Bashar Asad 8-dekabr kuni Suriya poytaxti Damashqqa hukumatga qarshi kuchlar kirib kelganida shaharni tashlab, Rossiyaga boshpana so‘rab ketgan. Asad hokimiyatdan ag‘darilgach, uning oilasi va yaqinlarining aktivlari “xalqaro miqyosda ovlanib”, pul yuvish va xorijda ko‘chmas mulk sotib olish bilan bog‘liq tergovlar boshlangan.
Izoh (0)