Qoraqalpog‘istonda iste’molga yaroqsiz alkogol va tamaki mahsulotlari savdosi bilan shug‘ullanib kelgan shaxslar ushlandi. Bu haqda Bosh prokuratura huzuridagi departament axborot xizmati xabar berdi.
Unga ko‘ra, departamentning Qoraqalpog‘iston boshqarmasining hududiy bo‘limlari tomonidan IIB xodimlari bilan hamkorlikda tezkor-qidiruv tadbirlari o‘tkazilgan. Qo‘ng‘irot, Shumanay, Taxiatosh va Amudaryo tumanlaridagi 4 ta savdo do‘koni va 1 ta umumiy ovqatlanish shoxobchasida savdoga qo‘yilgan turli nomdagi jami 806 dona qalbaki aksiz markali alkogol mahsulotlari ashyoviy dalil sifatida olingan.
Shuningdek, To‘rtko‘l, Taxtako‘pir va Xo‘jayli tumanlarida qonunga xilof ravishda alkogol va tamaki mahsulotlari savdosi bilan shug‘ullanib kelgan fuqarolar D.N., N.A., S.Ya. va R.M.dan qo‘lbola usulda tayyorlangan jami 706 dona turli hajmdagi “Qaratau” nomli alkogol hamda 12 turdagi 2 324 quti tamaki mahsulotlari ashyoviy dalil sifatida olingan.
Mazkur holatlar yuzasidan Jinoyat kodeksining 176-moddasi (qalbaki pul, aksiz markasi yoki qimmatli qog‘ozlar yasash, ularni o‘tkazish) va 186-1-moddasi (etil spirti, alkogolli mahsulot va tamaki mahsulotini qonunga xilof ravishda ishlab chiqarish yoki muomalaga kiritish) bilan jinoyat ishlari qo‘zg‘atilib, tergov harakatlari o‘tkazilmoqda.
Izoh (0)