Qozog‘iston hukumati so‘nggi 2,5 yil davomida umumiy qiymati 1 trillion tengedan ortiq (2 milliard 83 million AQSH dollari) bo‘lgan mablag‘larni mamlakatga qaytargan. Bu haqda Kazinform nashri xabar berdi.
Qaytarilgan mablag‘lar haqida Qozog‘iston korrupsiyaga qarshi kurash agentligi batafsil maʼlumot bergan. Unga ko‘ra, joriy yil boshidan beri mamlakatga jami 195 milliard tenge hajmdagi mablag‘lar qaytarilgan.
So‘nggi 2,5 yil ichida oligarxlardan qaytarib olingan davlat mulki va uning qiymati umumiy 1,09 trillion tengega baholangan. Bu mulklarning katta qismi sobiq prezident oilasiga tegishli bo‘lgan.
Korrupsiyaga qarshi kurash agentligi ayni paytda Nazarboyevning jiyani Qayrat Satibaldi mulklarini davlat hisobiga qaytarish operatsiyalari davom etayotganini bildirgan. Oldinroq sobiq prezident jiyani 1,6 milliard dollarlik aktivlarini davlatga topshirishga rozi bo‘lgani xabar qilingan edi.
Qayrat Satibaldidan qaytarib olingan aktivlar orasida Olmaotadagi qiymati 7,9 milliard tengedan ortiq bo‘lgan Kaisar Tower biznes markazi ham bor. Ushbu bino Qozog‘iston Milliy pedagogika qizlar universiteti ixtiyoriga o‘tkazilgan. Bundan tashqari, qiymati 800 million tenge atrofidagi yana bir bino Jurgenov nomidagi Qozog‘iston milliy badiiy akademiyasi tasarrufiga berilgan.
Poytaxtda joylashgan qiymati 5 milliard tengedan ortiq bo‘lgan uchta turar joy esa imkoniyati cheklangan bolalar uchun mo‘ljallangan Ostona shahar hokimligining “Psixologik-pedagogik tarbiyalash maskani” birlashmasiga topshirilgan.
Manbada qo‘shimcha qilinishicha, so‘nggi tadbirlar davomida Qozog‘istonga Avstriya, Fransiya, Lixtenshteyn, BAA, Turkiya, Rossiya va boshqa davlatlardan pul, qimmatli qog‘ozlar, ko‘chmas mulk va zargarlik buyumlari qaytarilgan. Avstriyadan qaytarilgan mablag‘lar 36,8 milliard tengeni, Lixtenshteyndan olingan mablag‘lar 116,7 milliard tengeni, Turkiyadan jalb qilingan pullar 2,2 milliard tenge hamda BAAdan mamlakatga qaytarilgan mablag‘lar 6,3 milliard tengeni tashkil etgan.
Bundan tashqari, sobiq sanoat va infratuzilmani rivojlantirish vaziri o‘rinbosari, mansab vakolatini suiisteʼmol qilganlikda ayblanib sudlangan T.To‘qtaboyevga nisbatan ham qo‘shimcha ish qo‘zg‘atilgan. Unga tegishli bo‘lgan Qo‘stanay viloyatidagi nikel va kobaltning katta zaxiralari davlat tasarrufiga olingan. Manbaga ko‘ra, Shevchenskoyedagi nikel va kobalt umumiy zaxirasi 5,6 trillion tengedan ko‘proq.
Izoh (0)