O‘zbekistonda 14-mart kuni oltin quymalar narxi rekord darajada oshdi. Bu haqda Markaziy bank ma’lum qildi.
Bir gramm oltin narxi 1 million 272 ming 440 so‘mni tashkil etdi. Bu bir kun avvalgi narxdan 1,6 foizga yuqoridir. 20-fevralda o‘rnatilgan avvalgi rekordga nisbatan qimmatbaho metall narxi 0,6 foizga oshgan. Ikki yarim oy ichida narxlar 12,4 foizga, yillik ko‘lamda esa 41,4 foizga o‘sgan.
14-mart holatiga ko‘ra oltin quymalari narxi quyidagicha bo‘ldi:
- 5 grammli oltin quyma — 6 million 362 ming so‘m;
- 10 grammli oltin quyma — 12 million 724 ming so‘m;
- 20 grammli oltin quyma — 25 million 449 ming so‘m;
- 50 grammli oltin quyma — 63 million 622 ming so‘m;
- 100 grammli oltin quyma — 127 million 224 ming so‘m.
100 grammli oltin quymalar O‘zbekistonda 2025-yil 17-yanvardan boshlab sotuvga chiqarilgandi.
Financial Times’ning yozishicha, yil boshidan beri oltin AQSHning yangi prezidenti Donald Trampning savdo siyosati va jahon savdosidagi keskinlikning kuchayishi fonida eng daromadli aktivga aylandi.
Oltin quymalari haqida
Oltin quymalar — og‘irligi 5, 10, 20, 50, 100 gramm bo‘lgan, 999,9 soflikdagi oltindan tayyorlangan quymalar. Maxsus himoya qadoqlarida sotuv uchun taqdim etiladi. Oltin quymalarning qadog‘i sertifikat vazifasini bajaradi va o‘z seriya raqamiga ega bo‘ladi. Ular himoyalangan qadoqlarda sotiladi va ularni bemalol uyda yoki bankda — individual bank yacheykalarini ijaraga olgan holda saqlash mumkin. Ularning narxi bir hafta ichida bir necha marta o‘zgarishi mumkin. Oltin quymalarini faqat banklarga sotish mumkin.
Oltinga investitsiya kiritish ishonchlimi?
Oltin boshqa metallar singari giperinflyatsiya va moliyaviy bozorlardagi global tartibsizlik davrida ham nol darajada qadrsizlanmaydi. Shu ma’noda u haqiqatan ham qimmatli qog‘ozlar va valyutaga qaraganda ishonchliroqdir.
Izoh (0)