AQSHda fond bozori “qulamoqda”. Bugun savdolar ochilganidan keyin 15 daqiqa o‘tar-o‘tmas fond bozori deyarli 2 trillion dollar yo‘qotdi.
AQSH sobiq prezidenti Donald Tramp fond bozorlarining qulashini Kamala Harris va Jo Baydenning qobiliyatsizligi bilan bog‘ladi. U Truth Social ijtimoiy tarmog‘ida ularni “noqobil” deb atadi.
“Qimmatli qog‘ozlar bozori qulamoqda. Men sizga aytgandim!!! Kamala hech narsani tushunmaydi. Bayden chuqur uyquda. Bularning barchasi Qo‘shma Shtatlarning nodon rahbariyati tufayli!” deb yozdi sobiq prezident.
Bugun, 5 avgust kuni Osiyo bozorlari birja indekslarining tarixiy pasayishiga duch keldi. Yaponiya fond birjalarida Nikkei va Topix 1987-yildagi “Qora dushanba”dan beri rekord darajadagi pasayish 13,4 foiz va 12,23 foizni qayd etdi, deb yozadi CNBC.
Janubiy Koreyaning KOSPI indeksi 2008-yildagi inqirozdan beri birinchi marta 8,8 foizga pasayish bilan yopildi, deya xabar beradi Reuters.
Osiyo bozorlaridagi qulash aksiyalarning sotilishi bilan bog‘liq bo‘lib, bunga Yaponiya Markaziy banki asosiy stavkasining oshishi va AQSHda retsessiya kutilishi sabab bo‘lishi mumkin. Goldman Sachs investitsiya banki iqtisodchilari 4-avgust, yakshanba kuni retsessiya ehtimolini 25 foizga baholadi, deb xabar beradi Bloomberg.
AQSHda savdolar ochilishida Dow Jones indeksi 1000 punktdan ortiq 3 foizga, Nasdaq yuqori texnologiyali indeksi esa 6 foizga yoki 800 punktga tushib ketdi.
Izoh (0)