Tokio va Sinshu universiteti olimlari genetik modifikatsiya qilingan virus asosida yangi teri saratoni dorisini ishlab chiqdi. Bu haqda mahalliy nashrlarga tayanib Anadolu xabar berdi.
Ma’lum qilinishicha, mazkur usul “virus terapiyasi” deb atalib, virus faqat saraton hujayralarida ko‘payib, ularni nishonga oladi va sog‘lom hujayralarga zarar yetkazmaydi.
Tokio universiteti professori Todo Toshiki boshchiligidagi tadqiqotchilar guruhi bu davolash usulini tez rivojlanadigan saraton turi bilan og‘rigan bemorlarda sinovdan o‘tkazgan. Tadqiqotlar natijasiga ko‘ra, an’anaviy muolaja bilan birgalikda virus terapiyasini olgan bemorlarning 77,8 foizida, ya’ni 9 kishidan 7 tasida sezilarli ijobiy natijalar kuzatilgan.
Eng e’tiborlisi shundaki, hozirgacha ushbu terapiya bilan bog‘liq jiddiy salbiy ta’sirlar aniqlanmagan. Shu sababli, mutaxassislar yaqin orada yana 9 nafar bemor ustida qo‘shimcha sinovlar o‘tkazishni rejalashtirmoqda.
Professor Todo ushbu usul an’anaviy davolashda samara bermagan holatlarda muqobil vosita bo‘lishi mumkinligini ta’kidlamoqda. Unga ko‘ra, agar virus terapiyasi boshqa saraton turlariga ham samarali bo‘lsa, ushbu jiddiy kasallikni davolashda “tub burilish” yasashi mumkin.
Kasallik alomatlari nimalarda namoyon bo‘ladi?
- yangi hosila (dog‘, qattiq yoki yiringli shish) paydo bo‘lishi;
- mavjud holatdagi tugun, xol yoki dog‘da o‘zgarish: ularning o‘sishi, qichishishi, qonashi;
- yuzaki yaralar tuzalmasligi kabilar.
Izoh (0)