Qoraqalpog‘istonning Beruniy hamda Toshkent viloyatining Oqqo‘rg‘on va Yangiyo‘l tumanlarida qo‘lbola alkogol mahsulotlarini muomalaga kiritilishining oldi olindi.
Bosh prokuratura huzuridagi departamentning Beruniy tumani bo‘limi tomonidan o‘tkazilgan tezkor tadbirda fuqaro Sh.S. “Jayhun” MFY hududidagi “E.” savdo do‘konida tegishli tartibda davlat ro‘yxatidan o‘tmasdan turli nomdagi jami 279 dona iste’molga yaroqsiz alkogol mahsulotlarini sotuvga qo‘ygani aniqlanib, ushbu alkogol mahsulotlari ashyoviy dalil tariqasida olingan.
Shu kabi, departamentning Oqqo‘rg‘on tumani bo‘limi tomonidan o‘tkazilgan tezkor tadbirda tumanidagi “D.” MCHJ rahbari D.T. xaridorga 2 dona qalbaki aksiz markali alkogol mahsulotini sotgan vaqtida ushlanib, ushbu savdo do‘konidan 233 dona qalbaki aksiz markali alkogol mahsuloti ashyoviy dalil sifatida olingan.
Departamentning Yangiyo‘l tumani bo‘limi tomonidan o‘tkazilgan tezkor tadbirda fuqaro P.M. yashash xonadonida yashirin sex tashkil etib, qo‘lbola alkogol mahsulotlarini ishlab chiqarish bilan shug‘ullanib kelgani aniqlanib, ushbu xonadondan “O‘zbegim” nomli qo‘lbola alkogol mahsulotlari va 120 litr spirt ashyoviy dalil sifatida olingan.
Mazkur holatlar yuzasidan Jinoyat kodeksining 176-moddasi (qalbaki pul, aksiz markasi yoki qimmatli qog‘ozlar yasash, ularni o‘tkazish) va 186-moddasi (xavfsizlik talablariga javob bermaydigan tovarlarni o‘tkazish maqsadini ko‘zlab ishlab chiqarish, saqlash, tashish yoxud o‘tkazish, ishlar bajarish yoki xizmatlar ko‘rsatish) bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq Samarqandda aroqdan zaharlanish oqibatida 5 nafar erkak vafot etgani haqida xabar berilgandi.
Andijon viloyatida 2024-yil dekabrida 5 kishi spirtli ichimlikdan zaharlanib vafot etgandi. 22 kishi O‘zbekiston aksiz markasi yopishtirilgan “O‘zbekiston” nomli konyak iste’mol qilgani oqibatida shifoxonaga o‘tkir zaharlanish tashxisi bilan yotqizilgan. Shifokorlar tomonidan ko‘rsatilgan zarur tibbiy yordamga qaramasdan, ularning 5 nafari vafot etgandi.
2025-yil 14-yanvar kuni Turkiyaning Istanbul shahrida 6 nafar o‘zbekistonlik fuqaro qalbaki alkogoldan zaharlanib vafot etdi.
Izoh (0)