AQSH davlat qarzi 36 trillion dollardan oshib, tarixiy rekordni yangiladi. Bu haqda AQSH Moliya vazirligi xabar berdi.
Vazirlik 21-noyabr holatiga ko‘ra davlat qarzi hajmi 36 034 994 586 981 dollardan sal ko‘proqni tashkil etganini e’lon qildi.
AQSHning davlat qarzi — federal hukumatning kreditorlar oldidagi qarz miqdoridir. Bunda kreditorlar sifatida xususiy shaxslar, masalan, Amerika fuqarolari yoki chakana xorijiy investorlar, shuningdek, davlatlar va yirik jamg‘armalar ham ishtirok etishi mumkin. AQSHning davlat qarzi ikki qismga bo‘linadi: ichki davlat qarzi va tashqi qarz.
Ichki davlat qarzi — bu turli davlat organlariga, jumladan, pensiya jamg‘armalariga bo‘lgan qarzdorlikdir. U umumiy qarz miqdorining taxminan 20 foizini — 7,3 trillion dollarni tashkil qiladi.
Tashqi qarzi — xususiy tashkilotlar, jismoniy shaxslar va chet davlatlar oldidagi qarz. U qarzning qolgan 80 foizini yoki 28,7 trillion dollarni tashkil etadi.
Vashington davlat obligatsiyalarini chiqarish orqali mablag‘ jalb qiladi. Ularni AQSH Moliya vazirligi muomalaga chiqaradi. Qimmatli qog‘ozlar ochiq bozorda, mamlakat fond birjalarida sotiladi, shuning uchun ularni har qanday xohlovchi shaxs sotib olishi va shu tariqa Amerika xazinasini qo‘llab-quvvatlashi mumkin.
2024-yil 3-yanvarda AQSH davlat qarzi birinchi marta 34 trillion dollardan oshgandi. Shunday qilib, bir yil ichida u 2 trillion dollarga ko‘paydi. Amerika davlat qarzi nominal ifodada dunyodagi eng katta qarz hisoblanadi.
O‘zbekistonning davlat qarzi qancha?
Joriy yil 1-yarmida O‘zbekiston davlat qarzi qoldig‘i 37 milliard dollarni tashkil etdi. Iqtisodiyot va moliya vaziri Jamshid Qo‘chqorovning aytishicha, 2024-yilning dastlabki yarmida davlat qarzi yalpi ichki mahsulotning 33,2 foiziga teng bo‘lgan. Prognozlarga qaraganda, mamlakat davlat qarzining yalpi ichki mahsulotga nisbati 2024-yilda 37 foiz, 2025-yilda 37,4 foiz, 2026-yilda 37,9 foiz atrofida bo‘lishi kutilmoqda. 2025-yil yakunida O‘zbekiston davlat qarzi 45,1 milliard dollarga yetishi pronoz qilinmoqda.
Izoh (0)