Kaan Urganjio‘g‘lu — “Sevgi iztirobi” serialidagi Amir rolini ijro etib, jahon miqyosida tanilgan iste’dodli turk aktyoridir. Turkdizi yulduzining ta’kidlashicha, aslida u qahramoniga mutlaqo o‘xshamaydi.
Kaan Urganjio‘g‘lu 1981-yil 8-mayda Izmirda tug‘ilgan. Otasi muvaffaqiyatli tadbirkor bo‘lgan, o‘zi esa yoshligidanoq iqtisodchi bo‘lishni orzu qilgan. Onasi va buvisi Kaanga bolalikdan san’atga muhabbat uyg‘otishga urinishgan, biroq bunda katta muvaffaqiyatga erisholmagan.
“Yetti yoshimda sahnaga chiqqanman. Buvim va onam menga katta matnni berishdi, uni yodlab olib, sahnaga chiqib aytib berishim kerak edi. Shunday qilib, sahnaga chiqdim va o‘qiy boshladim, keyin onamni ko‘rdim. Onam ham matnni yodlab olgan ekan, menga yordam berishga urinayotgan edi. O‘sha lahzada hamma narsa chappasiga ketdi... Men bir muddat dovdirab qoldim va mikrofonga: “Oyi, jim bo‘ling!” deb yubordim. Bir ozdan so‘ng zalda hamma kula boshladi”, deya hikoya qiladi u.
Izmirdagi o‘rta maktabni tugatgach, Urganjio‘g‘lular oilasi Amerikaga ko‘chib ketgan. 2000-yilda Kaan Turkiyaga qaytib, Marmara universitetiga o‘qishga kirgan, ammo ko‘p o‘tmay moliyaviy qiyinchiliklar tufayli akademik ta’til olishga majbur bo‘lgan. Shunga qaramay, u oliy ma’lumotni baribir olgan — 2007-yilda diplomli bo‘lgan. Talabalik yillarida qo‘shimcha daromad izlagan Urganjio‘g‘lu o‘zini modellik sohasida sinab ko‘rishga qaror qilgan. 2021-yilda uni prodyuser Abdulla O‘g‘uz o‘z serialida suratga tushishga taklif etgan. Ilk kinoloyihaning o‘zidayoq Kaan aktyorlik uning hayot yo‘li ekanligini tushunib yetgan. Aynan shu sababli u Amerikaga qaytib borgan va u yerda Stella Adler Acting & Theatre Academy studiyasi kurslarini tamomlab kelgan.
“Men aktyor bo‘lishimni aytdim, Nyu Yorkka ketdim, qaytib keldim, Qodir Has universitetida magistrlik darajasini oldim. Chetin Sarikartal bilan tanishdim. Ustoz Chetin bilan tanishganimdan so‘ng menda aktyorlik haqida jiddiy fikrlar shakllana boshladi”, deydi u.
Ijodi
Kaan Urganjiog‘lu 2002-yilda “Qarao‘g‘lon” serialida debyut qilgan. 2003-yilda u “Kampus” serialida Tolga rolini ijro etdi va keyingi ikki yil davomida o‘z aktyorlik mahoratini oshirish hamda aktyorlik san’ati kurslarini o‘tashga bag‘ishladi. 2006-yilda turk aktyori yana surtga tusha boshladi, biroq 2011-yilda Berkan rolini ijro etgan “Layli va Majnun” serialidan so‘ng tanildi.
2013-yilda Kaan “Sevgi” serialida Jan rolini ijro etdi, bir yildan so‘ng esa “Buyuk izquvar Filinta” serialida Otto Petrovich obrazini yaratdi. 2015-yilda Urganjiog‘liga “Sevgi iztirobi” serialida Amir roli taklif qilindi. Aktyor ssenariyni sinchiklab o‘rganib, uzoq o‘ylagach, rozilik berdi. Aynan shu serial uni jahon miqyosida mashhur qilib, haqiqiy turkdizi yulduziga aylantirdi. Kaan o‘z qahramoni haqida shunday hikoya qilgan edi:
“Amir qilayotgan hech bir ishidan zavq olmaydi, uning hayoti murakkab. Hammamizning hayotimiz murakkab, ehtimol shu tufayli unga hamdardlik bildiramiz. Yomon odamlarning o‘ziga xos jihati - bu ularning kulgisi, ular qilayotgan yovuzliklaridan lazzatlanadi. Amir tanganing boshqa tomonida juda yaxshi odam bo‘lishi mumkinligini, sharoitlar uni shu holatga olib kelganini o‘ylaydi. U murakkab hayot kechirishda davom etmoqda”.
Aktyorning keyingi karyerasi muvaffaqiyatli rivojlana boshladi. U Amerikaning “Jek Rayn” serialida Denizni, “Noreallik” filmida Muratni va “Sevgi 101” ko‘p qismli filmida Kamolni ijro etdi. Bu rollar unga Amir obrazidan xalos bo‘lishga yordam berdi. Uzoq vaqt davomida turk seriali muxlislari Kaanni haqiqiy hayotda ham xuddi o‘zi o‘ynagan qahramon kabi shafqatsiz va xavfli odam deb o‘ylashardi.
“Ha, menda sovuqqonlik bor, lekin undan foydalanmaslikka harakat qilaman... Bolalikdan bizda ayrim tuyg‘ular, masalan, aybdorlik yoki keraksizlik hissi yashiringan bo‘lishi mumkin. Hammamizda shunday bo‘ladi, keyin esa bu his-tuyg‘ularga katta yoshda kundalik muammolar qo‘shiladi”, degan edi u o‘zi haqida.
2021-yilda Kaan dunyoning ko‘plab mamlakatlarida haqiqiy hitga aylangan “Adolat” ko‘p qismli filmida Ilg‘oz rolini ijro etishga tasdiqlandi. Ushbu serialda suratga tushish bilan bir paytda, aktyor “Ishonchli qo‘llarda”, “Fortuna operatsiyasi: G‘alaba qozonish san’ati”, “Chaqiruv”, “Ishonchli qo‘llarda 2” kabi loyihalarda ham rol o‘ynadi.
Shaxsiy hayoti
2016-yilda Kaan Urganjio‘g‘lu Zeynep O‘mak bilan unashtirilganini ommaga e’lon qildi. U keyingi yil nikohdan o‘tishlarini aytgan bo‘lsa-da, bu voqea sodir bo‘lmadi. Biroq 2023-yilning yozida turk aktyori sevgilisi Burju Denizer bilan turmush qurdi va shu yilning dekabr oyida ular o‘g‘il farzandli bo‘lishdi. Bolaga Arduch deb ism qo‘yishdi.
Urganjio‘g‘lu shaxsiy hayoti haqida ko‘p gapirmaydi — u chinakam baxt ommaga oshkor qilinishga muhtoj emasligiga ishonadi. Aktyor ba’zan o‘g‘li va rafiqasi bilan tushgan suratlarini ijtimoiy tarmoqdagi sahifasiga joylashtiradi. Ammo barcha suhbatlarida u doimo Burjuning yonida haqiqiy baxtni his etganini ta’kidlaydi.
Kaan Urganjio‘g‘lu hozirda
Bugungi kunda turdizi yulduzi hayotining barcha jabhalarida muvaffaqiyatlarga erishmoqda. U talab yuqori, mashhur va yuqori maosh oladigan aktyor, baxtli er hamda ajoyib ota bo‘lishga muvaffaq bo‘ldi. Kaan ishdan bo‘sh vaqtining barchasini oilasi davrasida o‘tkazadi. Turk aktyori muntazam ravishda sport zaliga qatnaydi, sog‘lom ovqatlanishga harakat qiladi, baliq ovlashni yaxshi ko‘radi va ko‘p vaqtini tabiat qo‘ynida o‘tkazadi.
Kaanning eng ezgu orzusi — o‘g‘liga munosib namuna bo‘lishdir. Urganjio‘g‘lu nafaqat orzularga ishonish, balki ularni amalga oshirish uchun barcha imkoniyatlardan foydalanish kerakligiga ishonadi. Uning fikricha, o‘zini bag‘ishlash, mehnatsevarlik va tanlangan kasbga sadoqat — bular doimo muvaffaqiyatga erishish imkonini beradigan omillardir.
Izoh (0)