Amerikalik milliarder Ilon Maskning boyligi uning Tesla kompaniyasi aksiyalari o‘sishi fonida 26,5 milliard dollarga oshdi, deb yozadi Bloomberg.
Respublikachi Donald Trampning AQShdagi saylovlardagi g‘alabasidan so‘ng qimmatli qog‘ozlar narxi 15 foizga oshib, har bir aksiya uchun 289 dollarni tashkil qildi.
Ilon Maskning umumiy boyligi 290 milliard dollarga yetdi, u Bloomberg milliarderlar indeksida birinchi o‘rinni egallab turibdi. Reytingda ikkinchi o‘rinda Amazon asoschisi Jeff Bezos joylashgan, uning boyligi AQShdagi prezidentlik saylovlari fonida 3 foizga o‘sgan. Oracle bosh direktori Larri Ellison va investor Uorren Baffet ham boyligining o‘sishi bo‘yicha yetakchilar qatoridan joy oldi.
Donald Tramp AQSHdagi prezidentlik saylovlarida katta farq bilan Kamala Harris ustidan g‘alaba qozondi. U yanvar oyida prezidentlikka kirishadi. Ilon Mask uni saylov kampaniyasi davomida faol qo‘llab-quvvatlab, kampaniyani moliyalashtirish uchun 119 million dollar ajratgan.
Izoh (0)