Eronning “Persepolis” klubi kot-d’Ivuarlik himoyachi Serj Orye bilan shartnoma imzolaganini rasman e’lon qildi. Klub matbuot xizmatining ma’lum qilishicha, kelishuv 2026-yil yoziga qadar amal qiladi.
32 yoshli futbolchi o‘tgan mavsum davomida hech bir klubda to‘p surmagan. Uning so‘nggi jamoasi Turkiyaning “Galatasaroy” klubi bo‘lib, u istanbulliklar tarkibida 2022-yil fevraldan 2024-yil iyulgacha faoliyat yuritgan. Shundan so‘ng Orye hech qanday klub bilan shartnoma tuzmagan edi. Futbolchi 2023/24-yilgi mavsum “Galatasaroy” tarkibida jami 17 uchrashuvda maydonga tushib, 2 assist muallifiga aylangan. Transfermarkt portali himoyachining qiymatini 1,5 million yevroga baholagan.
Ma’lumot uchun, Serj Orye “Tuluza”, “PSJ”, “Tottenhem”, “Vilyarreal” va “Nottingem Forest” klublarida ham o‘ynagan.
Eslatib o‘tamiz, “Persepolis” o‘tgan mavsum Eron chempionatini 3-o‘rinda yakunlagan. Tehron klubi chempion bo‘lgan “Traktor”dan 8 ochkoga ortda qolgan.
Ta’kidlash joizki, “Persepolis” safida O‘zbekiston milliy terma jamoasi a’zosi Oston O‘runov ham harakat qilmoqda.
Izoh (0)