Rossiya 17-iyunga o‘tar kechasi Ukraina poytaxti Kiyevga dronlar bilan yirik zarba berdi. Hodisa oqibatida 14 kishi halok bo‘ldi. Bu haqda shahar harbiy ma’muriyati rahbari Timur Tkachenko xabar berdi.
Ma’lum qilinishicha, hodisa oqibatida 40 dan ortiq odam jarohatlangan. Solomenskiy tumanidagi ikkita turar-joy binosi shikastlangan, ularning kamida bittasida yong‘in chiqqan, ikkinchisida esa bino konstruksiyalari vayron bo‘lgan. Qutqaruvchilar vayronalar ostidan odamlarni qidirish ishlarini olib bormoqda.
Solomenskiy, Svyatoshinskiy, Darnitskiy, Dneprovskiy, Podolskiy va Obolonskiy tumanlaridagi 12 ta joyda hujumlar qayd etilgan. Kiyevda aviatsiya instituti yotoqxonasi, bolalar bog‘chasi, turar joy binolariga zarar yetgan. Dnepr tumanida Shahed tipidagi dron bo‘laklari turar-joy binosi devoriga tiqilib qolgan. Dastlabki ma’lumotlarga ko‘ra, yong‘in sodir bo‘lmagan, hech kim jabrlanmagan.
Solomenskiydan tashqari, Darnitskiy va Svyatoshinskiy tumanlarida ham yong‘inlar qayd etilgan. Rossiya dronlarining Kiyevga avvalgi yirik hujumi 10-iyunga o‘tar kechasi amalga oshirilgandi. Ukraina poytaxtining yettita tumani zarba ostida qolgandi, bir nechta yong‘inlar sodir bo‘lgandi. O‘shanda to‘rt kishi jarohatlangan edi.
11-iyunga o‘tar kechasi Rossiya dronlari Xarkovga hujum qilgandi. Bir nechta turar-joy binolariga jiddiy zarar yetgandi. Uch kishi halok bo‘lgan, 60 kishi jarohatlangandi. Ertasi kuni kechasi Xarkovni o‘qqa tutish davom etgan.
Izoh (0)