Yevropa Ittifoqi 10-iyun kuni Rossiyaga qarshi yangi sanksiyalar paketini e’lon qildi. Bu haqda CNN xabar berdi.
Ittifoqning fikricha, Moskvaning Ukrainaga qarshi har kungi hujumlari uning tinchlikdan manfaatdor emasligini ko‘rsatmoqda.
Yangi sanksiyalar paketi Kremlning neft va gaz qazib olishdan pul ishlash qobiliyatini nishonga olgan. Bu Rossiya 2022-yilda Ukrainaga qarshi keng ko‘lamli bosqinni boshlaganidan beri 18-sanksiya hisoblanadi.
Sanksiya Rossiya nefti eksporti narxining yuqori chegarasini bir barrel uchun 60 dollardan 45 dollargacha pasaytirishni ko‘zda tutadi. Bundan tashqari, u uchinchi mamlakatlardagi Rossiya banklari va moliya institutlari bilan operatsiyalarni to‘liq taqiqlashni o‘z ichiga oladi.
YI, shuningdek, Rossiya energetika infratuzilmasidan foydalanishni taqiqlashni taklif qilmoqda. Ittifoq mamlakatlariga “Shimoliy oqim” quvurlari bilan bog‘liq har qanday operatsiyalarda bevosita yoki bilvosita ishtirok etish ham taqiqlanishi bildirilgan.
Yangi paket Yevropa Ittifoqining 27 davlati tomonidan tasdiqlanishi kerak bo‘ladi. Bunda Vengriya va Slovakiya kabi Kreml tarafdori bo‘lgan ba’zi hukumatlar jarayonni murakkablashtirishi mumkinligi aytilgan. Avvalroq ikkala davlat ham sanksiyalarni bloklash bilan tahdid qilgan bo‘lsa-da, hozirda ular taqiqlarni yoqlab ovoz bergan.
Yevrokomissiya rahbari Ursula fon der Lyayen sanksiyalar “kuch Rossiya tushunadigan yagona til bo‘lgani uchun” zarurligini aytgan.
“Biz Ukrainaga tinchlik tilaymiz. Ukraina prezidenti Vladimir Zelenskiyning so‘zsiz o‘t ochishni to‘xtatish taklifiga qaramay, Rossiya Ukrainaga o‘lim va vayronagarchilik keltirishda davom etmoqda. Rossiyaning maqsadi tinchlik emas, balki kuch hukmronligini o‘rnatishdir. Shuning uchun biz Rossiyaga bosimni kuchaytirmoqdamiz”, dedi Fon der Lyayen.
Germaniya, Fransiya, Buyuk Britaniya va Polsha rahbarlari may oyida Rossiya yetakchisi Vladimir Putinga 30 kunlik o‘t ochishni to‘xtatishga rozi bo‘lishini yoki ehtimoliy “qattiq” sanksiyalarga duch kelishini aytgan edi. Putin ultimatumni e’tiborsiz qoldirib, uning o‘rniga Moskva va Kiyev o‘rtasida to‘g‘ridan to‘g‘ri muzokaralar o‘tkazishni taklif qilgandi.
YI nima uchun Rossiyaning energetika sektorini nishonga olganini tushuntirar ekan, komissiya rahbari neft eksporti hali ham Rossiya hukumati daromadlarining 1/3 qismini tashkil etishini va bu daromad manbayini qisqartirish kerak ekanligini aytgan.
Neft narxining yuqori chegarasi 2022-yil dekabr oyida Yevropa Ittifoqi va G7 davlatlari tomonidan joriy etilgan.
Izoh (0)