AQSH prezidenti Donald Tramp Rossiyaning sobiq rahbari Dmitriy Medvedev bilan X ijtimoiy tarmog‘ida keskin ziddiyatga bordi. Siyosatchilar o‘rtasidagi bahsga Medvedevning Ukraina borasidagi izohi sabab bo‘ldi. Bu haqda The Economic Times xabar berdi.
Tramp Rossiyaga qarshi yangi sanksiyalarni e’lon qilishini aytganidan so‘ng, Medvedev AQSH prezidentini tanqid qilgan va mamlakatni Isroil va Eronga qiyoslamaslikni ta’kidlagan.
“Tramp Rossiyaga ultimatumlar qo‘ymoqda: avval 50 kun, endi 10 kun. U shuni bilib qo‘ysinki, Rossiya — na Isroil, na Eron. Har bir ultimatum urush sari qadamdir”, deb yozgan Medvedev.
Bunga javoban Tramp X’da quyidagicha post joylagan:
“Medvedev — yutqazgan sobiq prezident, o‘zini hanuz rahbar deb o‘ylaydi. U so‘zlariga ehtiyot bo‘lishi lozim. Juda xavfli hududga kirib kelyapti!”
Tramp, shuningdek, Hindistondan import qilinadigan mahsulotlarga 25 foizlik boj joriy etganini eslatib, Hindiston va Rossiyaning iqtisodiy aloqalarini tanqid qilgan:
“Agar Hindiston Rossiya bilan iqtisodini qulatmoqchi bo‘lsa, marhamat. Menga buning mutlaqo farqi yo‘q”.
Bunga javoban Medvedev Trampni “yurib ketayotgan murdalar” haqidagi filmlarni eslashga chaqirgan. U AQSH prezidentining Hindiston va Rossiyaning “o‘lik iqtisodiyoti” haqidagi bayonotlariga shunday munosabat bildirdi:
“Agar Rossiya sobiq prezidentining ba’zi so‘zlari AQSH prezidentida bunday asabiy reaksiyani keltirib chiqarsa, demak, Rossiya hamma narsada haq va o‘z yo‘lida davom etadi”.
Tramp iyul o‘rtalarida Rossiyaga qarshi yangi sanksiyalar joriy etilishi borasida ogohlantirish bergan, xususan, u agar sentyabr boshigacha tinchlik borasida o‘zgarish bo‘lmasa, boj tariflari joriy etilishini bildirgandi. Endilikda u Putinga 10–12 kun muddat belgilamoqda — bu esa avgust boshigacha muzokaralarda ijobiy o‘zgarishlar bo‘lishi kerakligini anglatadi.
Trampning birinchi prezidentlik davri oxirlariga kelib AQSH Rossiyaga nisbatan ba’zi sanksiya va diplomatik bosimlarni kuchaytirgandi. Bu Medvedevning tanqidlariga sabab bo‘lib, u Trampni “zaif” yoki “ikkiyuzlama” siyosatda ayblagandi.
Ma’lumot uchun, Dmitriy Medvedev 2008–2012-yillarda Rossiya prezidenti lavozimida ishlagan. Hozirgi kunda siyosatchi Rossiya Xavfsizlik kengashi raisi o‘rinbosari sifatida faoliyat yuritmoqda.
Izoh (0)