Rossiya armiyasi Ukraina bo‘ylab bir vaqtning o‘zida mingdan ortiq Shahed dronlarini uchirishga tayyorlanmoqda. Bu haqda The Economist xabar berdi.
Xabarga ko‘ra, Rossiyaning yangi zarbalari tobora murakkablashib bormoqda. Agar o‘t ochishni to‘xtatish bo‘yicha muzokaralar barbod bo‘lsa, Ukraina havo hujumidan mudofaa tizimi o‘zining tutib oluvchi raketalarini normallashtirishiga to‘g‘ri keladi. Rossiya Shahed dronlarini ishlab chiqarishni sezilarli darajada oshirgani xavf tug‘dirmoqda.
Atigi bir yil oldin Ukrainaga bir kechada 30 ta dron hujumi g‘ayrioddiy hodisa hisoblangan. Endi esa Rossiya muntazam ravishda yuzlab dronlarni uchirmoqda. Jurnalistlar 25-mayga o‘tar kechasi Rossiya Ukrainaga eng yirik havo hujumini amalga oshirganini eslatdi. Mazkur aviahujumga 298 ta dron jalb etilgan.
2024-yilda Rossiyada oyiga o‘rtacha 300 ga yaqin Shahed ishlab chiqarilgan. Hozir esa bunday miqdor uch kundan kamroq vaqt ichida ishlab chiqarilmoqda, deyiladi xabarda.
Ukraina Mudofaa vazirligiga ko‘ra, rossiyaliklar kuniga 500 ta Shahed ishlab chiqarmoqchi. Agar ular o‘z maqsadiga erishsa, Ukrainaga bir vaqtning o‘zida 1000 ta dron bilan zarba berish haqiqatga aylanishi mumkin.
Ukrainalik aviatsiya eksperti Konstantin Krivolapning fikricha, bir vaqtning o‘zida 1000 ta Shahedʼning uchirilishi, katta ehtimol bilan, shunchaki balandparvoz bayonotdir. U Rossiyaning qurol sanoati yolg‘on hisobotlarga tayanishini ma’lum qildi. Shunga qaramay, ekspert rossiyaliklar haqiqatan ham ko‘proq dronlar ishlab chiqarishni boshlaganini tan oldi.
Ukraina ilk bor 2023-yil iyul oyida Rossiya Eronning Shahed dronlaridan foydalanishni boshlaganini e’lon qilgandi. 2024-yil dekabrda Yevropa Ittifoqi Erondagi beshta dron ishlab chiqaruvchi kompaniyaga nisbatan sanksiyalar joriy qilgan edi.
Izoh (0)