Rossiya 11-iyunga o‘tar kechasi 17 ta Shahed tipidagi hujumchi dronlar bilan Xarkovga hujum qildi. Bu haqda “Ukrainska pravda” xabar berdi.
Slobodskiy va Osnovyanskiy tumanlariga uyushtirilgan ommaviy hujum oqibatida 2 kishi halok bo‘lgan, 54 kishi yaralangan, ulardan 8 nafari bolalar. Xususan, 2 yoshli qiz va 15 yoshli o‘g‘il bola shifoxonaga yetkazilgan. Yong‘in ichida qolgan xonadonlardan bir necha kishi qutqarilgan. Ma’lum qilinishicha, hujum 00:31 da boshlangan va 00:40 gacha davom etgan.
Ko‘p qavatli turar joy binolari, xususiy uylar, bolalar maydonchalari, jamoat transporti va sanoat obyektlariga to‘g‘ridan to‘g‘ri zarbalar berilgani aytilgan. Hodisa oqibatida turar joy xonadonlarida yong‘inlar sodir bo‘lgan, binolarning tomlari vayron bo‘lgan, avtomobillar yonib ketgan, portlash to‘lqinidan derazalar parchalanib ketgan. Shuningdek, trolleybuslar, havo liniyalari, kommunal va sanoat obyektlari shikastlangan.
Slobodskoy tumanida dushman dronlari trolleybus deposiga hujum qilgani qayd etilgan. 9 nafar jabrlanuvchi kasalxonaga yotqizilgan.
6-iyun kuni ham Xarkovga hujum uyushtirilgan edi. Hodisa oqibatida 4 kishi halok bo‘lgan, 60 ga yaqin kishi yaralangan. Taxminan 18 ta ko‘p qavatli uy va yana 13 ta uyga zarba berilgan. Jabrlanganlar orasida chaqaloq va 14 yoshli qiz ham bor, deya qo‘shimcha qilingan.
Shuningdek, Rossiyaning Ukraina janubidagi Xersonga bergan zarbalari oqibatida 2 kishi halok bo‘lgandi. Shaharga 48 ta dron, 2 ta raketa va 4 ta qanotli bomba tashlangan. 7-iyun kuni esa yana qanotli bombalar tashlangani ma’lum qilingandi.
5-iyunga o‘tar kechasi esa Rossiya mamlakatga 400 dan ortiq dron va 40 ga yaqin raketa bilan hujum qilganida Ukraina bo‘ylab 6 kishi halok bo‘lgan va 80 kishi yaralangandi.
Izoh (0)