Rossiya Ukrainaning Odessa shahrini o‘z nazoratiga olishni, so‘ngra Ruminiya va Moldova chegarasiga yetib borishni rejalashtirmoqda. Bu haqda Ukraina prezidenti Vladimir Zelenskiy Odessada o‘tayotgan “Ukraina—Janubi-Sharqiy Yevropa” sammitida ma’lum qildi.
Ukraina davlat rahbari Odessa Rossiya uchun nishon ekanini ta’kidlagan.
“Nihoyat, biz yana o‘z go‘zal shahrimiz Odessaga qaytib keldik. Bu ajoyib shahar Rossiyaning nishoniga aylanib qolgan. Ular bosib olingan hududlardagi son-sanoqsiz shahar va qishloqlarni vayron qilgani kabi, Odessani ham yo‘q qilishni istaydi. Rossiyaning harbiy rejalari aynan shu mintaqa — Odessaga, so‘ngra Moldova va Ruminiya chegaralariga qaratilgan. Albatta, hozir bizga himoya kerak. Ammo bundan-da ko‘proq, ushbu voqealar hech qachon takrorlanmasligi uchun uzoq muddatli kafolatlarga muhtojmiz”, deydi Vladimir Zelenskiy.
Zelenskiy Odessa viloyati mintaqani beqarorlashtirish nuqtai nazaridan Rossiya uchun muhim maqsad ekanini bildirgan.
“Biz buni ilgari Bolqonda ko‘rganmiz, u yerda Rossiya millatlararo ziddiyatlarni kuchaytirgan, buzg‘unchilik harakatlarini amalga oshirgan va hatto davlat to‘ntarishlarini uyushtirishga uringan”, Ukraina prezidenti.
U sammit ishtirokchilarini urushdan keyingi xavfsizlik kafolatlarini amaliy zarurat sifatida ko‘rib chiqishga da’vat etdi.
“Havo hujumidan himoyalanishdan tortib kibertahdidlargacha — bizga haqiqiy tiyib turish va tezkor munosabat bildirish vositalari kerak. Keling, bitimlarimizni, qurolli kuchlarimizni va infratuzilmamizni ko‘rib chiqaylik hamda mamlakatlarimiz xavfsizligini ta’minlaydigan barcha narsani mustahkamlaylik”, deya ta’kidlagan Vladimir Zelenskiy.
Bundan avval Vladimir Zelenskiy Ukraina oyiga 27 ming kishini, Rossiya esa 40-50 ming kishini safarbar qila olishini ma’lum qilgandi.
Izoh (0)