Prezident Shavkat Mirziyoyev “Markaziy Osiyo – Xitoy” ikkinchi sammitida nutq so‘zladi. Bu haqda Prezident matbuot xizmati xabar berdi.
Davlat rahbari bugungi uchrashuv xalqaro vaziyat sezilarli darajada yomonlashib borayotgan sharoitda bo‘lib o‘tayotganini qayd etdi.
“Yo‘qotish va talafotlarga sabab bo‘ladigan mojarolar yangidan alanga olmoqda, global va mintaqaviy darajadagi yirik davlatlar o‘rtasida o‘zaro ishonchsizlik kuchaymoqda. Raqobatning ortishi keskinlikning zo‘rayishiga, xavfsizlik va barqaror taraqqiyotga yangi xavf va tahdidlar paydo bo‘lishiga olib kelmoqda.
Nizoli xalqaro masalalar va ziddiyatli muammolarni hal qilish uchun kuch ishlatish vositalaridan foydalanish o‘zini oqlamaydi va bunga yo‘l qo‘yib bo‘lmaydi, deb hisoblaymiz”, deydi O‘zbekiston prezidenti.
Shavkat Mirziyoyev Si Szinpinning davom etayotgan mojarolar va urushlarda hech qanday g‘oliblar bo‘lmaydi, degan so‘zlariga to‘liq qo‘shilishini taʼkidladi.
“Barcha nizo va ziddiyatlar suverenitetni hurmat qilish, xalqaro huquq meʼyorlari va Birlashgan Millatlar Tashkiloti nizomi asosida faqat diplomatik saʼy-harakatlar yo‘li bilan – muzokaralar stolida hal etilishi shart.
Taʼkidlash kerakki, oldindan aytib bo‘lmaydigan bunday sharoitda xalqaro munosabatlarning hozirgidan ko‘ra barqaror tizimlarini taʼminlash uchun mamlakatlarni birlashtirishga qodir bo‘lgan mintaqaviy mexanizmlarning ahamiyati va roli oshmoqda”, deydi O‘zbekiston yetakchisi.
Davlat rahbari bugun mamlakatlar o‘rtasidagi Abadiy yaxshi qo‘shnichilik, do‘stlik va hamkorlik to‘g‘risidagi shartnomaning qabul qilinishini tarixiy voqea, deb hisoblashini bildirdi.
Izoh (0)