Prezident Shavkat Mirziyoyev Xitoyning China State Construction, China General Nuclear Power, CAMCE, Goldwind va ZTO Express kompaniyalari rahbarlari bilan uchrashuv o‘tkazdi. Bu haqda Prezident matbuot xizmati xabar berdi.
Davlat rahbari Xitoy biznesining O‘zbekistonga qiziqishi har doimgidek yuqori ekanini mamnuniyat bilan qayd etdi. O‘tgan yilning o‘zida ushbu mamlakatdan jalb qilingan investitsiyalar hajmi 10 mlrd dollardan oshdi.
China State Construction kompaniyasi direktorlar kengashi raisi Chjen Syuesyuan bilan suhbatda Toshkent shahrida yo‘l infratuzilmasini modernizatsiya qilish borasidagi hamkorlik natijalari yuksak baholandi. Toshkent shahrida madaniyat obyektlarini tashkil etish bo‘yicha istiqbolli rejalar muhokama qilindi. Toshkent viloyatida sanoat zonasini barpo etish loyihasini boshlash hamda kompaniya avtomobil yo‘llari qurilishida ishtirok etishi to‘g‘risida kelishib olindi.
China General Nuclear Power korporatsiyasi raisi Yan Chanli bilan muzokaralarda tog‘-kon sanoatida sheriklikni mustahkamlash masalalari diqqat markazida bo‘ldi. Geologiya-qidiruv ishlarini jadallashtirish va yangi konlarni o‘zlashtirishga qiziqish bildirildi. Kompaniyaning gibrid quyosh elektr stansiyasini qurish va bojxona yuklarini skanerlash texnologiyalarini joriy qilish rejalari qo‘llab-quvvatlandi.
CAMCE korporatsiyasi raisi Van Bo bilan poytaxtimizda Olimpiya shaharchasini barpo etish bo‘yicha birgalikda amalga oshirilgan ishlar sarhisob qilindi. Kompaniya boshqaruvida Toshkent shahridagi “Yangi avlod” industrial texnoparki jadal rivojlanayotgani qayd etildi. Qo‘shma tashabbuslar portfelini kengaytirish, xususan, elektr energetikasi va Yangi Toshkent shahrini infratuzilmaviy rivojlantirish loyihalarini jadallashtirishga alohida eʼtibor qaratildi.
Goldwind kompaniyasi raisi Vu Gang bilan kompaniyaning “yashil” energetikani rivojlantirishdagi ishtiroki yuzasidan fikr almashildi. O‘zbekistonda kompaniya bilan birgalikda shamol elektr stansiyalari uchun butlovchi qismlar ishlab chiqarish yo‘lga qo‘yilgan. Shamol generatorlari ishlab chiqarishni mahalliylashtirish va joriy loyihalarni faollashtirishga kelishib olindi.
ZTO Express kompaniyasi rahbari Xu Syanlyan davlat rahbariga O‘zbekistonda tovarlarni bojxona rasmiylashtiruvidan o‘tkazishga ko‘maklashish bo‘yicha onlayn platformani ishga tushirish va “aqlli” logistika omborlarini tashkil etish niyati haqida maʼlumot berdi.
Shuningdek, Shavkat Mirziyoyev Ummon savdo, sanoat va investitsiyalarga ko‘maklashish vaziri Qays bin Muhammad al-Yusufni qabul qildi. Uchrashuv avvalida yuqori martabali mehmon davlat rahbariga Ummon sultoni Haysam bin Toriq Ol Saidning samimiy salomini yetkazdi.
Amaliy hamkorlikni, eng avvalo, savdo-iqtisodiyot va investitsiya sohalarida kengaytirish masalalari ko‘rib chiqildi. Turli darajalardagi faol muloqotlar mamnuniyat bilan qayd etildi. Forum doirasida Hukumatlararo komissiyaning navbatdagi yig‘ilishi va ishbilarmon doiralarning uchrashuvlari bo‘lib o‘tadi.
Energetika, geologiya, oziq-ovqat, to‘qimachilik, kimyo sanoati, transport va logistika, turizm, moliya sohalarida qo‘shma loyihalarni, shu jumladan O‘zbekiston-Ummon investitsiya kompaniyasining faol ko‘magida ilgari surish muhimligi qayd etildi.
Shavkat Mirziyoyev, shu bilan birga, Yevropada xavfsizlik va hamkorlik tashkilotining amaldagi raisi, Finlyandiya tashqi ishlar vaziri Elina Valtonenni qabul qildi. Suhbat avvalida oliy martabali mehmon davlat rahbariga Finlyandiya prezidenti Aleksandr Stubbning salomi va eng ezgu tilaklarini yetkazdi.
O‘zbekiston bilan YXHT o‘rtasida amaliy aloqalarni mustahkamlash hamda O‘zbekiston-Finlyandiya hamkorligini yanada kengaytirish masalalari muhokama qilindi. Milliy saylov tizimini modernizatsiya qilish, ommaviy axborot vositalari erkinligini taʼminlash, gender va yoshlar masalalari, “yashil” kun tartibi bo‘yicha tashkilot bilan konstruktiv hamkorlik rivojlanib borayotgani mamnuniyat bilan qayd etildi. Iqlim xavfsizligi va barqaror rivojlanish masalalariga eʼtiborni kuchaytirish muhimligi taʼkidlandi.
O‘zbekiston-Finlyandiya munosabatlarining, eng avvalo, savdo-iqtisodiy, investitsiyaviy va madaniy-gumanitar sohalardagi kun tartibi batafsil ko‘rib chiqildi. Mintaqaviy masalalar yuzasidan ham fikr almashildi, bo‘lajak tadbirlar rejasi ko‘rib chiqildi.
Izoh (0)