Bandlik rejasini to‘liq bajarmagan 15 ta tuman hokimi uch oyda rejaga chiqmasa, ishdan olinishi mumkin. Bu haqda 16-iyun kuni Shavkat Mirziyoyev raisligidagi videoselektor yig‘ilishida ma’lum qilindi.
Yig‘ilishda qayd etilishicha, birinchi yarim yillikda 2 million 600 ming aholini band qilish, 722 ming odamni kambag‘allikdan chiqarish reja qilingan. Lekin mablag‘ va sharoit bo‘lsa-da, bandlik rejasi 15 ta tumanda to‘liq bajarilmagan.
Bular – Muborak, Bo‘ston, Vobkent, Marhamat, Farg‘ona, Zangiota, Do‘stlik, Chortoq, Qorao‘zak, Uychi, Xonobod, Yangibozor, Parkent, Arnasoy va Uchko‘prik tumanlari. Ushbu tuman hokimlari uch oyda rejaga chiqmasa, barchasi ishdan olinishi qayd etildi.
Aholini kambag‘allikdan chiqarish bo‘yicha Uchquduq, Angren va Karmanada ishlar sustligi ko‘rsatib o‘tildi.
Yig‘ilishda Xalq qabulxonalarining barcha xodimlari ishdan bo‘shatilib, masalani hal qila oladigan fidoyi kadrlar bilan to‘ldirilishi ham aytildi. Davlat rahbari suyultirilgan gaz yetkazishdagi muammo bo‘yicha rahbarlarga so‘nggi ogohlantirish berdi. “Bu masalaga ikki haftada yechim topsin, bo‘lmasa o‘zi bilib joyini bo‘shatib qo‘ysin”, dedi prezident.
Shavkat Mirziyoyev hokim, vazirlar topshiriq kutmasdan, o‘zi tashabbus ko‘rsatib ishlashga o‘tishi shartligini ham qayd etib o‘tdi.
Izoh (0)