Hindistondagi aviahalokat samolyot dvigatellarining ishdan chiqishi oqibatida sodir bo‘lgan bo‘lishi ehtimoli bor. Hindistonning News18 telekanali manbasi Air India samolyoti halokati sabablariga oid yangi taxminni bildirdi.
“Halokatga ikkala dvigatelning ishdan chiqishi sabab bo‘lgan bo‘lishi mumkin”, deyiladi xabarda.
Kanal suhbatdoshining aytishicha, ikkala dvigatel ham ishdan chiqqanda, uchuvchi dispetcherlarga falokat signalini yuborgan. Shu bilan birga, manba yakuniy xulosalar chiqarish uchun hali vaqt erta ekanini ta’kidlagan.
Samolyot halokati sabablari bo‘yicha tergov davom etmoqda. Ilgari bort halokatining ehtimoliy sabablari sifatida uchuvchining xatosi yoki qushlar bilan to‘qnashuv ko‘rsatilgandi.
Hindistonning aholi yashaydigan hududida samolyot halokatga uchragani haqida 12-iyun kuni ma’lum bo‘ldi. Samolyot bortida 242 kishi bo‘lgan, ulardan faqat bittasi — 11A o‘rindig‘ida o‘tirgan yo‘lovchi omon qolgan. Samolyot yotoqxona binosiga qulagani sababli talabalar orasida ham jabrlanganlar bor - dastlabki ma’lumotlarga ko‘ra, 50 kishi, yana besh kishini qutqarib qolishning iloji bo‘lmagan. Shuningdek, ijtimoiy tarmoqlarda halokat lahzasi va voqea joyidan olingan videolar paydo bo‘ldi.
Prezident Shavkat Mirziyoyev Ahmadobodda yuz bergan aviahalokat oqibatida ko‘plab insonlar halok bo‘lgani va jiddiy jarohat olgani munosabati bilan Hindiston prezidenti Draupadi Murmu va bosh vaziri Narendra Modiga taʼziya maktubi yo‘lladi.
Izoh (0)