Shavkat Mirziyoyev 16-iyundagi videoselektor yig‘ilishida yo‘llardagi kameralar dislokatsiyasi aholining e’tiroziga sabab bo‘layotganini aytdi.
“Ular faqat qoidabuzarlikni qayd etib, jarima yozish uchun ishlayapti. Bu kameralar aslida transport oqimini boshqarish, tirbandlik va avariyani kamaytirishga xizmat qilishi kerak”, dedi prezident.
Shavkat Mirziyoyev aholi jamoat transporti sifati va tirbandliklardan mutlaqo norozi ekanini qayd etdi.
Chorraha, chiziq va yo‘l belgilarini to‘g‘rilash, svetoforlarni “aqlli” boshqaruvga o‘tkazish bo‘yicha ishlar sustligi tanqid qilindi. Poytaxtda transport harakatini sun’iy intellekt asosida tartibga solish bo‘yicha taqdimot qilinganiga ham ancha vaqt bo‘lgani, lekin natija yo‘qligi ko‘rsatib o‘tildi.
Yig‘ilishda qayd etilishicha, so‘nggi 7 yilda yo‘l qurish va ta’mirlashga berilgan 61 trillion so‘mning asosiy qismi xalqaro va respublika yo‘llariga to‘g‘ri keladi. Lekin o‘lim bilan bog‘liq avtohalokatning 75-80 foizi ham shu yo‘llarda bo‘lyapti.
Izoh (0)