Prezident Toshkent shahri va viloyat markazlarida birorta hokim bo‘sh joylarni topib, yashil hudud, odamlar toza havoga chiqib o‘tiradigan joylar, sport maydonchalari, favvoralarni ko‘paytirishni o‘ylamayotganini tanqid qildi.
16-iyundagi videoselektor yig‘ilishida davlat rahbari bor sport maydonchalari va bolalar o‘yingohlari, uylar orasidagi yashil hududlar qurilish uchun berib yuborilayotganidan odamlar norozi ekanini aytdi
Misol uchun, barcha ko‘p qavatli uylarga tutash hududlarni boshqaruv kompaniyalariga biriktirib berish bo‘yicha topshiriq berilgan. Lekin Toshkent shahri hokimining 5 maydagi qarori bilan 9 802 ta ko‘p qavatli uylarning faqatgina bino ostidagi yerlari kadastr bilan biriktirilgan.
“Maqsadi bitta – qolgan yerlarni qurilish qilish uchun tadbirkorlarga sotish! Qani topshiriq nazorati? Qani qonunning kuchi?”, dedi prezident.
Bosh prokuror o‘rinbosari Salom Samadovga, adliya vaziri Akbar Toshqulovga “O‘zbekkosmos” va Kadastr agentligi bilan birgalikda qaysi hududda “yashil” hudud, sport maydonchasi, bolalar o‘yingohi boshqa maqsadlar uchun berib yuborilgan bo‘lsa, hammasini aniqlab, joyiga qaytarish topshirildi.
Ko‘p qavatli uylarga tutash hududlarni boshqaruv kompaniyalariga berish bo‘yicha hokimlarning qarorlarini o‘rganib, qonunga zidlarini bekor qilish vazifasi qo‘yildi.
Yig‘ilishda bandlik rejasini to‘liq bajarilmagan 15 ta tuman hokimi uch oyda rejaga chiqmasa, ishdan olinishi haqida ogohlantirildi. Xalq qabulxonalarining barcha xodimlari ishdan bo‘shatilib, masalani hal qila oladigan fidoyi kadrlar bilan to‘ldirilishi aytildi. Davlat rahbari suyultirilgan gaz yetkazishdagi muammo bo‘yicha rahbarlarga so‘nggi ogohlantirish berdi. Shavkat Mirziyoyev hokim, vazirlar topshiriq kutmasdan, o‘zi tashabbus ko‘rsatib ishlashga o‘tishi shartligini ham qayd etib o‘tdi.
Izoh (0)