Yevropa tiklanish va taraqqiyot banki O‘zbekiston bo‘ylab 110 ta sug‘orish nasos stansiyasini modernizatsiya qilish uchun 250 million dollargacha bo‘lgan suveren kredit ajratadi. Bu haqda Investitsiyalar, sanoat va savdo vazirligi matbuot xizmati xabar berdi.
Toshkent xalqaro investitsiya forumi doirasida bu borada tegishli bitim imzolandi. Suveren kredit davlat tomonidan olingan qarz mablag‘i bo‘lib, bu qarz bo‘yicha mas’uliyat bevosita davlat zimmasida bo‘ladi.
Loyihada 10 ta hudud qamrab olinadi va u O‘zbekiston sug‘orish tizimini modernizatsiya qilish bo‘yicha Milliy dastur ijrosiga ko‘maklashadi. Natijada yiliga 251 ming megavatt soat elektr energiyasi tejaladi va atmosfera havosiga chiqariladigan karbonat angidrid miqdori 117 ming tonnadan ortiq kamayadi. Shuningdek, loyiha doirasida nasos stansiyalarining tomlariga quyosh panellari o‘rnatilishi kabi qo‘shimcha infratuzilma ham yangilanadi.
Hozirgi kunda YTTBning O‘zbekistondagi investitsiyaviy portfeli 5,6 milliard yevro qiymatidagi 181 ta loyihani o‘z ichiga oladi. Mablag‘larning asosiy qismi xususiy sektorni rivojlantirishga yo‘naltirilgan. O‘zbekiston besh yildirki, Markaziy Osiyoda YTTB investitsiyalarining eng yirik manzili bo‘lib qolmoqda.
Shavkat Mirziyoyev 11-iyun kuni Xorijiy investorlar kengashining uchinchi majlisi arafasida YTTB prezidenti bilan sheriklik masalalarini muhokama qilgandi. Davlat rahbari hamkorlik natijadorligini oshirish muhimligini ta’kidlab, uning asosiy ustuvor yo‘nalishlarini ko‘rsatib o‘tgandi. Ular qatorida suv ta’minoti tizimini texnologik jihatdan modernizatsiya qilish ham bor edi.
O‘zbekistonda 4,3 million gektar sug‘oriladigan maydon bo‘lib, shuning 60 foizi nasoslar yordamida sug‘oriladi. Prezident tomonidan suv xo‘jaligida “2025 yil – “Nasoslar samaradorligini oshirish yili” deb belgilangan. Bugungi kunda qishloq xo‘jaligi ekin maydonlarini sug‘orish hamda iqtisodiyotning boshqa tarmoqlarini suv bilan ta’minlash uchun 1 700 ga yaqin nasos stansiyalardan foydalaniladi. Ularni ishlatish va belgilangan suv miqdorlarini chiqarish uchun bir yilda 7 milliard kilovatt soat elektr energiyasi talab etiladi.
Izoh (0)