Shavkat Mirziyoyev 16-iyundagi videoselektor yig‘ilishida go‘sht, sut, parranda go‘shti va tuxum narxi barqaror bo‘lishi shartligini aytdi.
Go‘sht, sut, parranda go‘shti va tuxum narxi keskin oshmasligi, korxonalar “soya”dan chiqib ishlashi uchun QQSning yarmini keshbek qilib qaytarish tartibi o‘tgan hafta tasdiqlangan edi. Mutasaddilar keshbekni bir kunga bo‘lsa ham kechiktirmaslik zarurligi haqida ogohlantirildi.
“Hokimlarni ham ogohlantiraman, ushbu yangi mexanizm asosida go‘sht, sut, parranda go‘shti va tuxum narxi barqaror bo‘lishi shart. Buni eplay olmaganlari ishdan ketadi”, dedi prezident.
Sud qarorlari vaqtida ijro bo‘lmayotgani yuzasidan murojaatlar juda ko‘pligi qayd etildi. O‘tgan yili MIBga yuborilgan har beshta sud qaroridan bittasi ijro qilinmagani tanqid qilindi.
Yig‘ilishda davlat rahbari suyultirilgan gaz yetkazishdagi muammo bo‘yicha rahbarlarga so‘nggi ogohlantirish berdi. “Bu masalaga ikki haftada yechim topsin, bo‘lmasa o‘zi bilib joyini bo‘shatib qo‘ysin”, dedi prezident.
Izoh (0)