Avstriya hukumati Grats shahridagi maktabda yuz bergan otishma munosabati bilan uch kunlik milliy motam e’lon qiladi. Bu haqda mamlakat kansleri Kristian Shtoker ma’lum qildi, deya xabar bermoqda OE24 nashri.
“Bugun sodir bo‘lgan voqea — milliy fojiadir. Bu qilmish barchamizga ta’sir ko‘rsatdi. Butun Avstriya uch kunlik milliy motam davomida qurbonlarni xotirlaydi”, dedi u.
Motam chorshanba kuni e’lon qilinadi. Mahalliy vaqt bilan soat 10:00 da bir daqiqalik sukut saqlanadi.
10-iyun kuni ertalab 22 yoshli yigit Avstriyaning Grats shahridagi maktabda o‘q otishni boshladi. U ikki sinfdagi o‘quvchilarga hujum qildi. Qo‘shni xonalardan birida o‘qituvchi o‘quvchilar bilan birga to‘siq qo‘yib berkindi. So‘nggi ma’lumotlarga ko‘ra, hujum oqibatida 10 kishi halok bo‘lgan, yana 28 kishi jarohat olgan. Keyinroq gumonlanuvchining jasadi maktab hojatxonalaridan biridan topildi. Dastlabki ma’lumotlarga ko‘ra, u ushbu maktabning sobiq o‘quvchisi bo‘lgan. Yigitning o‘zi esa o‘zini zo‘ravonlik qurboni deb hisoblagan.
Avstriya hukumati otishma munosabati bilan barcha ichki siyosiy tadbirlarni bekor qildi. Avstriya kansleri Kristian Shtoker hukumat a’zolari, jumladan, ichki ishlar vaziri Gerhard Karner va ta’lim vaziri Kristof Viderker bilan birga Grasga yo‘l olgan.
Shtoker favqulodda xizmatlar xodimlariga minnatdorchilik bildirib, sodir bo‘lgan voqea barcha avstriyaliklarga “inson sifatida, ota-ona sifatida, jamiyat a’zosi sifatida” daxldor ekanligini ta’kidlab, xalqni birdamlikka chaqirgan.
“Gratsdagi maktabda sodir bo‘lgan otishma butun mamlakatimizni larzaga solgan milliy fojiadir. Bu aql bovar qilmas harakat hali oldinda katta hayot turgan yoshlarning umrini to‘satdan uzib qo‘ydi. Hozir barchamiz — butun Avstriya his qilayotgan og‘riq va qayg‘uni so‘z bilan ifodalash mushkul”, dedi Avstriya kansleri.
Izoh (0)