Bugun Toshkentda boshlangan xalqaro investisiya forumida 3 mingdan ziyod delegat, shu jumladan, 100 ga yaqin davlatdan kelgan mehmonlar ishtirok etayotgani, yuzlab shartnomalar va kelishuvlar kutilayotgani haqida eshitib hayratda qoldim. Shu o‘rinda o‘z mulohazalarimni bildirgim keldi.
Men — ziyoli insonman, tarix fanidan dars berganman, hozirda pensiyadaman. Bolalarimni uyli-joyli qildim, endi nevaralarim, evaralarim tarbiyasi va hovlimdagi tomorqam bilan bandman. Qishloq xo‘jaligi mahsulotlari yetishtirib, ortig‘ini bozorga olib chiqaman. Endi esa shu mahsulotlarimni yevropaliklar xarid qilayotgani haqida eshitib, yanada hayajonga tushdim. Kelasi yil qishlog‘imizga yaqin joyda qayta ishlash korxonasi qurilishi rejalashtirilyapti.
Aslida men ishlamasam ham bo‘ladi, ammo bunday yaxshi paytda uyda bekor o‘tirish mumkinmi? Har bir yangilikni diqqat bilan kuzatib, mamlakatimizdagi taraqqiyotga o‘z hissamni qo‘shayotganimdan mamnunman.
Nega shunday deb o‘ylayapman? Chunki mening yoshim, ko‘rgan-kechirganlarim, oldingi davrlar bilan taqqoslashga imkon beradi. Qishlog‘imiz tuman markazidan ancha uzoqda joylashgan. O‘n yillar avval elektr tinimsiz o‘char, radio har kuni ishlamasdi. Butun qishloq mamlakatimizda nima bo‘layotganini, hukumatimiz qaysi ishlar bilan band ekanini bilmasdi. Do‘stlarimdan ko‘pchiligi “biz tomonlarga ham katta rahbarlarimiz kelarmikin” degan umid va armon bilan o‘tib ketishdi.
Biroq bugungi kun – mutlaqo boshqacha. Qishlog‘imizdagi yo‘llar tuzatildi, medpunkt ochildi, maktab yangidan qurildi, telefon va internet keldi. Endi shaharga borish shart emas — aksincha, shaharliklar bizning tomonlarga dam olishga kelishyapti.
Televizor doimiy ishlayapti — bu biz uchun eng katta xursandchilik. Qishloq xalqi dunyodagi yangiliklarga qiziqadi, gurung qilishni yaxshi ko‘radi. Kuni kecha televideniyeda eshitdik: Toshkentga 3000 nafar mehmon kelayotgan ekan. Ular orasida dunyoda tan olingan siyosatchilar, sarmoyadorlar bor. Ular bilan zavodlar, elektr stansiyalari, yo‘llar qurish, agrokomplekslar tashkil etish masalalari muhokama qilinayotgani bizni hayratga soldi.
Bu mehmonlar Amerika, Xitoy, Fransiya, Saudiya Arabistoni, Hindiston va Yaponiyadan kelishyapti. Ular Prezidentimiz bilan muloqot qilyapti, birgalikda sarmoya kiritish, yangi ishlab chiqarish korxonalari tashkil etish haqida kelishuvlar imzolayapti. Quriladigan ishlab chiqarish obyektlari esa faqat eksport uchun emas, ichki bozor talabini ham qondirishga xizmat qiladi.
Men tarix fanidan dars bergan inson sifatida ko‘p narsani ko‘rganman. Lekin bunday ko‘lamdagi harakatlar, dunyo davlatlari bilan bunday darajada hamkorlikni birinchi marta guvohi bo‘lmoqdaman. Bunday ulkan tadbirlarning o‘tkazilishi — yurtimizda tinchlik, barqarorlik va ishonchli sarmoya muhiti mavjudligidan darak beradi.
Sarmoyadorlar bekorga kelmaydi. Ularga tinchlik, qonuniy kafolatlar, ishonchli muhit kerak. Shu jihatdan qaraganda, bugungi O‘zbekiston dunyoga ochilgan, munosib sherik bo‘la oladigan mamlakatga aylandi. Buni tan olish kerak.
Televizorda ko‘rib qolamiz — qayerlardadir urushlar, ishsizlik, ochlik… Shunda shukr qilaman: "E, xayriyatki, bizda tinchlik bor, rahbarimiz omon bo‘lsin!" Prezidentimiz boshchiligida olib borilayotgan faol siyosat, sarmoyadorlarga berilayotgan kafolatlar bugungi muvaffaqiyatlar zaminidir.
Bunday forumlar dunyo bilan hamnafas yurtimizning yangi rivojlanish bosqichidir. Televizordan chiqib, shunday chaqiriq qilgim keladi: "Kelinglar, do‘stlar, birgalikda ishlaymiz, foyda olamiz, uni yangi maktab, kasalxona, universitetlarga yo‘naltiramiz. Bu hayot — tinchlik va barqarorlik asosida quriladi."
Men ishonaman, davlatimiz rahbari boshlagan islohotlar nafaqat biz, balki qo‘shni xalqlarga ham yangi imkoniyatlar eshigini ochadi.
Mirodil Eshmurodov
Izoh (0)