Buxoro viloyatida chavandozlar mahorat maktabi o‘z faoliyatini boshladi, deya xabar berdi “Daryo” muxbiri.
Sport yakka kurashi bo‘yicha ixtisoslashtirilgan bolalar-o‘smirlar sport maktabi balansidagi “Otchopar” sport majmuasida ish boshlagan chavandozlar maktabi Buxoro tumanidagi “Sheyxoncha” mahalla fuqarolar yig‘inida joylashgan bo‘lib, Milliy gvardiyaning viloyat boshqarmasi tasarrufiga kiritilgan.
“Maktab prezidentimizning 2021-yil 11-martdagi ‘Yilqichilik va ot sportini yanada rivojlantirish hamda zamonaviy besh kurash va polo sport turini ommalashtirish bo‘yicha qo‘shimcha chora-tadbirlar to‘g‘risida’gi hamda 2021-yil 5-avgustdagi ‘Chavandozlar maktablari faoliyatini tashkil etish chora-tadbirlari to‘g‘risida’gi qarorlari asosida barpo etilgan. ‘Otchopar’ bazasi 1986-yilda qurilgan bo‘lib, umumiy maydoni 12,8 gektardan iborat. 7,5 gektari ekinga, 1,2 gektari mashg‘ulotlar o‘tkazishga mo‘ljallangan. Bu yerda zamonaviy drenaj tizimiga ega ochiq va yopiq manejlar qad rostlagan bo‘lib, barcha kerakli jihozlar bilan ta’minlangan. Inshoot maydoni Qorovulbozor tumanidagi Gavanna cho‘lidan keltirilgan qum bilan qoplangan. Majmua nafaqat milliy, balki xalqaro darajadagi musobaqalarni ham o‘tkazishga tayyor”, — deydi maktab direktori Farhod Sa’dullayev.
“Otchopar” inshooti “Sport obyektlari infratuzilmasini rivojlantirish bo‘yicha injiniring kompaniyasi” davlat unitar korxonasi buyurtmasiga ko‘ra, 2021-yil 5 milliard so‘m mablag‘ evaziga qurilgan bo‘lib, mashg‘ulotlar va musobaqalar o‘tkaziladigan yozgi manej, tomoshabinlar uchun esa 600 o‘rinli ayvondan iborat.
Direktorning aytishicha, maktabda 11 turdagi 34 bosh zotli ot bo‘lib, ular Italiya va Ispaniyadan keltirilgan.
“Ayni paytda maktabda 100 nafardan ortiq yosh chavandozlar tayyorlanmoqda. Tarixga nazar tashlasak, Buxoroda chavandozlik mahorati ming yillarga borib taqaladi. Chavandozlarimiz Italiya, Fransiya, Ispaniya, Avstriya kabi davlatlarda o‘tkazilgan musobaqalarda peshqadam bo‘lgan”, — deydi Farhod Sa’dullayev.
Milliy gvardiyaning viloyat boshqarmasi axborot xizmati rahbari Murodjon Rahmatullayevning bildirishicha, viloyatda yana 25 bosh otga mo‘ljallangan karantin zona, yopiq manej, shu jumladan, jangovar manej, otlarni qadamlash uchun joy (shagalka) ham barpo etiladi.
Izoh (0)