Germaniya kansleri Angela Merkelning aytishicha, mamlakatda koronavirus epidemiyasining uchinchi to‘lqini yuz bermoqda. Bu haqda Merkel Konservativ partiya a’zolari bilan uchrashuvda aytib o‘tdi, deb yozmoqda “Korrespondent.net”.
“Biz hozir pandemiyaning uchinchi to‘lqinini boshdan kechiryapmiz”, — dedi Merkel hamda karantinning har qanday tarzda yumshatilishi ehtiyotkorlik bilan va bosqichma-bosqich amalga oshirilishi kerakligi haqida ogohlantirdi.
Xususan, virusning yuqumliroq turiga chalinish holatlari avj olgan Avstriya va Chexiya bilan bog‘liq barcha ikkilamchi korxonalar va chegaralar yopilishini nazoratga olish Germaniya uchun COVID-19’ning kunlik o‘sishini kamaytirishda yordam bergan. Shu bilan birga, emlash sur’atining pastligi va Germaniyada aniqlangan yangi shtammlarning keng tarqalish xavfi cheklovlarning har qanday tarzda yumshatilishini qiyinlashtirishi mumkin.
“Biz pandemiyaning ketma-ket to‘lqinlariga dosh berolmaymiz”, — deya ta’kidladi kansler.
Angela Merkel agar infeksiyalanish holati yana orta boshlasa, qaytadan karantin joriy qilmaslik uchun normal hayotga qaytish masalasi ehtiyotkorlik bilan hal qilinishi tarafdoriligini bildirdi.
Merkel cheklovlarni yumshatish mumkin bo‘lgan uchta yo‘nalishni alohida ta’kidladi. Bular — shaxsiy muloqot doirasi, maktab hamda kasb-hunar kollejlari, shuningdek, madaniyat, restoran va sport. Shu bilan birga, kansler aholini hushyorlikni susaytirmaslikka chaqirdi.
Jons Hopkins universiteti ma’lumotlariga ko‘ra, Germaniyada pandemiya boshidan beri 2,4 million kishi koronavirusga chalingan, 68,7 ming kishi kasallikdan vafot etgan.
Bundan avval Angela Merkel insoniyat qanday shart bilan koronavirus ustidan g‘alaba qozonishini ma’lum qilgani hamda Germaniya karantin cheklovlarini 7-martgacha uzaytirgani haqida xabar berilgandi.
Izoh (0)