Австрия ҳукумати Грац шаҳридаги мактабда юз берган отишма муносабати билан уч кунлик миллий мотам эълон қилади. Бу ҳақда мамлакат канцлери Кристиан Штокер маълум қилди, дея хабар бермоқда OE24 нашри.
“Бугун содир бўлган воқеа — миллий фожиадир. Бу қилмиш барчамизга таъсир кўрсатди. Бутун Австрия уч кунлик миллий мотам давомида қурбонларни хотирлайди”, деди у.
Мотам чоршанба куни эълон қилинади. Маҳаллий вақт билан соат 10:00 да бир дақиқалик сукут сақланади.
10 июнь куни эрталаб 22 ёшли йигит Австриянинг Грац шаҳридаги мактабда ўқ отишни бошлади. У икки синфдаги ўқувчиларга ҳужум қилди. Қўшни хоналардан бирида ўқитувчи ўқувчилар билан бирга тўсиқ қўйиб беркинди. Сўнгги маълумотларга кўра, ҳужум оқибатида 10 киши ҳалок бўлган, яна 28 киши жароҳат олган. Кейинроқ гумонланувчининг жасади мактаб ҳожатхоналаридан биридан топилди. Дастлабки маълумотларга кўра, у ушбу мактабнинг собиқ ўқувчиси бўлган. Йигитнинг ўзи эса ўзини зўравонлик қурбони деб ҳисоблаган.
Австрия ҳукумати отишма муносабати билан барча ички сиёсий тадбирларни бекор қилди. Австрия канцлери Кристиан Штокер ҳукумат аъзолари, жумладан, ички ишлар вазири Герҳард Карнер ва таълим вазири Кристоф Видеркер билан бирга Грасга йўл олган.
Штокер фавқулодда хизматлар ходимларига миннатдорчилик билдириб, содир бўлган воқеа барча австрияликларга “инсон сифатида, ота-она сифатида, жамият аъзоси сифатида” дахлдор эканлигини таъкидлаб, халқни бирдамликка чақирган.
“Грацдаги мактабда содир бўлган отишма бутун мамлакатимизни ларзага солган миллий фожиадир. Бу ақл бовар қилмас ҳаракат ҳали олдинда катта ҳаёт турган ёшларнинг умрини тўсатдан узиб қўйди. Ҳозир барчамиз — бутун Австрия ҳис қилаётган оғриқ ва қайғуни сўз билан ифодалаш мушкул”, деди Австрия канцлери.
Изоҳ (0)