Zarafshon daryosining “Urganji” mahallasi hududidan oqib o‘tuvchi hududida nazorat tadbirlari o‘tkazildi, deb xabar berdi Ekologiya vazirligi.
Maʼlum qilinishicha, tekshiruv davomida Navoiy viloyati Navbahor tumanida yashovchi fuqaro I.I. o‘ziga tegishli texnika vositalari yordamida daryo tubidan noqonuniy ravishda qum-shag‘al aralashmasini qazib olib, transport vositalariga ortganligi aniqlandi.
Huquqbuzarga nisbatan ma’muriy bayonnoma rasmiylashtirilib, BHMning 30 baravari — 11 mln 250 ming so‘m miqdorida jarima belgilandi. Shuningdek, huquqbuzarning texnika vositalari jarima maydonchasiga joylashtirildi.
Bundan tashqari, tabiatga yetkazilgan 14 mln 152 ming 320 so‘m zarar ham undirilishi belgilandi.
Shuningdek, hodisa joyidan qochishga uringan yuk avtomashinalari haydovchilari ichki ishlar organlari orqali aniqlandi. Davlat inspektorlarining talablarini bajarmaganliklari uchun ularga nisbatan ma‘muriy ish qo‘zg‘atildi.
Daryolar o‘zanlaridagi noruda materiallarni qazib olishga muddatsiz moratoriy joriy etilgan
Prezident farmoni bilan Chirchiq, Sangzor, Zarafshon, Norin, Qashqadaryo, Surxondaryo va Sirdaryo daryolari o‘zanlaridagi noruda materiallarni qazib olishga 2024-yil 1-maydan muddatsiz moratoriy joriy qilindi. Noqonuniy qazib olish ishlari natijasida tabiatga yetkazilgan zarar uchun javobgarlik ham kuchaytirildi.
Shunga qaramay, noqonuniy qum-shag‘al qazib olish davom etmoqda. 12-fevral kuni Surxondaryo va Toshkent viloyatlarida tabiiy qum xomashyosini o‘zboshimchalik bilan qazib olish holatlari fosh etildi. Toshkent viloyati Bekobod tumanida noqonuniy ravishda qum qazib olinishi oqibatida tabiatga 100 milliard so‘mdan ortiq zarar yetkazildi.
13-yanvarda Samarqandning ikki hududida qum-shag‘al qazib olinishi oqibatida tabiatga 826 milliard so‘m zarar yetkazilgandi.
Izoh (0)