Zarafshon, Oqdaryo, Qoradaryodan noruda qazilmalarini qazib olishni ishchi guruh o‘rganmoqda. Bu haqda Samarqand viloyati hokimi vazifasini bajaruvchi Adiz Boboyev hokimlik apparati yig‘ilishida maʼlum qildi.
Adiz Boboyevning aytishicha, daryolardan noruda qazilmalarni qazib olish tartibsiz bo‘lib ketgani uchun holatni o‘rganish bo‘yicha topshiriq berilgan.
Nima bo‘ldi bu daryoni taqdiri? Tamom bo‘lib bo‘lgan, hech narsasi qolmagan bu daryoni. Hamma joyini abgor qilib tashlashgan. Buni qanday tartibga keltiramiz, o‘ylab o‘yimga yetolmayapman. Bir xil joylarda eni yuzlab metrga cho‘zilib ketgan. Hamma yog‘ini abgor qilib tashlashgan, hamma o‘zboshimcha, dedi viloyat hokimi.
Uning alohida taʼkidlashicha, kelajak avlod mazkur holat bo‘yicha savollarni o‘rtaga tashlaydi va bunga sababchi bo‘lgan rahbarlardan norozi bo‘ladi.
Kelajak avlod — nevaralarimiz nima deydi? Ota-bobolarimiz mana shunaqangi — “sovg‘a” qilib ketgan deb aytishadi-ku. Nima deb javob beramiz? O‘sha paytda ishlagan rahbarlarimiz bunga qaramagan, o‘g‘riga sherik bo‘lib yurgan, degan narsani aytadi.
Shu yerda o‘tirganlarning ayrimlarini “drabilkasi” bo‘lsa kerak? Bu o‘g‘rilik, boshqa narsa emas. O‘g‘rilikni javobi bor tuman hokimlari, sektor rahbalari tomosha bo‘lib turmasin. Har bitta tumanda ekologiya bo‘limi bor. Hamma o‘sha yerdagi “drabilkasi”ni ko‘chirsin, birortasi qolmasin, dedi Adiz Boboyev.
Eslatib o‘tamiz Chirchiq, Sangzor, Zarafshon, Norin, Qashqadaryo va Surxondaryo daryolari o‘zanlaridagi noruda materiallarni qazib olishga muddatsiz moratoriy joriy qilingan.
Maʼlumot uchun, Adiz Boboyev 2024-yilning noyabr oyida Erkinjon Turdimov o‘rniga Samarqand viloyatiga hokim etib tayinlangan edi.
Izoh (0)